ახალციხეში, 9 აპრილს დაღუპულების ხსოვნას პატივი მიაგეს
11:31 / 09.04.2019
ახალციხეში, 9 აპრილის მემორიალთან ადგილობრივი ხელისუფლების წარმომადგენლები და მოქალაქეები, 1989 წლის 9 აპრილს დაღუპულთა ხსოვნისადმი პატივის მისაგებად შეიკრიბნენ.
მემორიალთან ახალციხის მერიისა და გამგეობის წარმომადგენლები, სასულიერო პირები და 9 აპრილის მოვლენების მონაწილეები არიან.
30 წლის წინ თავისუფლებისთვის ბრძოლაში დაღუპულთა მოსახსენიებელი პარაკლისი დეკანოზმა, მამა იოანე გელაშვილმა გადაიხადა. პარაკლისის შემდეგ ფოლკლორულმა ანსამბლმა „მესხეთმა“ რამდენიმე სიმღერა შეასრულა.
1989 წლის 9 აპრილს, დილის 04:00 საათზე, თბილისში, შოთა რუსთაველის გამზირზე, მაშინდელი მთავრობის სასახლის წინ, საბჭოთა კავშირის სპეციალური დანიშნულების რაზმმა მშვიდობიანი მიტინგი სასანგრე ნიჩბების, ხელკეტებისა და მომწამლავი გაზის გამოყენებით დაარბია. მიტინგის დაშლისას 21 მოქალაქე დაიღუპა.