სოფელ კლდეში მეფრინველეობის ფერმა ფუნქციონირებს, რომელსაც ახალციხის მკვიდრი დავით ათუნაშვილი ხელმძღვანელობს. ფაბრიკაში, დღეისათვის, გაფართოება მიმდინარეობს.

ახალციხის მუნიციპალიტეტის სოფელ კლდეში მეფრინველეობის ფაბრიკაში 12 000 ფრთა ქათმის გვერდით  ბინას მალე ამავე რაოდენობის კვერცხისმდებელი ფრინველი დაიდებს. ობიექტის გაფართოება უკვე მიმდინარეობს. სამცხე–ჯავახეთში მსგავსი ტიპის ფერმა  არ არსებობს. მისი დაფუძნება სწორედ ამიტომ გადაწყდა. „მესხეთის მეფრინველეობის“ კვერცხით დღეისათვის სამცხე–ჯავახეთის სუპერმარკეტები მარაგდება. შპს–ს დირექტორი ამბობს, რომ მოთხოვნა დიდია და ამიტომ გაფართოების შემდეგ, რეგიონის ბაზარს მაინც ვერ გაცდება.

დავით ათუნაშვილის მეფრინველეობის ფაბრიკაში  ამ დროისათვის 15 ადამიანია დასაქმებული. გაფართოების შემდეგ მუშა–ხელის რაოდენობა გაიზრდება და ადგილობრივ მოსახლეობას საშუალება მიეცემა სოფელშივე დასაქმდეს. ფაბრიკაში ძირითადი საქმიანობა გალიების დასუფთავება, დღეში ორჯერ ქათმების კვება, კვერცხების მოგროვება და მისი დახარისხებაა. თითოეული,   წონის მიხედვით თავის ადგილს იკავებს.

მეფრინველეობის ფაბრიკაში ქათმის სპეციალური  ჯიშს – სუპერნიკს უვლიან. ზედმეტი ხარჯების თავიდან აცილების მიზნით, ადგილზევეა მოწყობილი წისქვილი, სადაც სხვადასხვა სახეობის მარცვლეულს ფქვავენ. გარდა ამისა, ფაბრიკის ხელმძღვანელები ცდილობენ თანამედროვე ტექნიკა შეიძინონ და სტანდარტები მაქსიმალურად მაღალ დონეზე აიყვანონ.

შპს „მესხეთის მეფრინველეობა“  სოფელ კლდეში ერთი წლის წინ გაიხსნა. ფაბრიკამ საქმიანობა სახელმწიფო  პროგრამის დაფინანსებით დაიწყო. ფერმაში 220 ათასი აშშ დოლარის ინვესტიცია განხორციელდა. შეღავათიანი აგროკრედიტის ფარგლებში მეფრინველეობის ფერმა 230 ათასი ლარით სარგებლობს.