ԱՄՆ-ը Ռուսաստանի դեմ պատժամիջոցների նոր կարևոր փաթեթ կներկայացնի փետրվարի 23-ին, ճեպազրույցում հայտարարել է Սպիտակ տան Ազգային անվտանգության խորհրդի խոսնակ Ջոն Քիրբին։

Քիրբին նշել է, որ պատժամիջոցների նոր փաթեթի մասին կհայտարարվի ուրբաթ օրը։

Պատժամիջոցները գալիս են ի պատասխան Ուկրաինայի դեմ Ռուսաստանի լայնածավալ պատերազմի և ընդդիմության առաջնորդ Ալեքսեյ Նավալնիի մահվանը:

Քիրբին նաև հորդորել է Կոնգրեսի ստորին պալատին՝ Ներկայացուցիչների պալատին, ընդունել վարչակազմի առաջարկած անվտանգության փաթեթը, որը ներառում է օգնություն Ուկրաինային:

Միևնույն ժամանակ, Եվրամիությունը Ռուսաստանի դեմ պատժամիջոցների գործողության ժամկետը երկարաձգել է մինչև 2025 թվականի փետրվարի 24-ը

Ինչպես նշվում է Եվրամիության խորհրդի հաղորդագրության մեջ, տեղին է ուժի մեջ թողնել Ռուսաստանի դեմ պատժամիջոցները, քանի որ Կրեմլը շարունակում է ուժ կիրառել Ուկրաինայի դեմ՝ խախտելով միջազգային իրավունքը։

Եվրամիությունը Ռուսաստանի դեմ պատժամիջոցների փաթեթն ընդունել է 2022 թվականի փետրվարի 23-ին։ Երբ Մոսկվան ճանաչեց Դոնբասում գործող անջատողական կազմավորումները:

Պատժամիջոցները երկարաձգվեցին 2022 թվականի հոկտեմբերի 6-ին այն բանից հետո, երբ Ռուսաստանը հայտարարեց Ուկրաինայի չորս շրջանների անեքսիայի մասին։