Ոսկու միջազգային բորսայում ֆիքսվել է աճի միտում՝ մեկ շաբաթում թանկարժեք մետաղի գինն ավելացել է լրացուցիչ 2,4%-ով, իսկ ոսկու ունցիայի գինը հասել է 1819 դոլարի։

Ոսկու պահանջարկի աճը պայմանավորված է ամբողջ աշխարհում սպառողական գների կտրուկ աճով և աշխարհաքաղաքական ռիսկերի աճով։ Ընդհանուր առմամբ, ոսկին համարվում է գնաճից հեջավորման (ներդրումային դիրք) ավանդական միջոցներից մեկը, և կենտրոնական բանկերն այն գնում են ֆինանսական անկայունությունից իրենց ապահովագրելու համար։

Ոսկու գնի աճը կապված է ներդրողների սպասումների և կենտրոնական բանկերի որոշումների հետ։ ԱՄՆ Դաշնային պահուստային համակարգը, Եվրոպական կենտրոնական բանկը և Անգլիայի բանկը անցյալ շաբաթ որոշեցին խստացնել դրամավարկային քաղաքականությունը 50-ական բազիսային կետով՝ 75 կետի փոխարեն։ Բացի այդ, FED-ը հայտարարել է վերաֆինանսավորման տոկոսադրույքի աճի տեմպի դանդաղման մասին։

Պետք է հաշվի առնել, որ ԱՄՆ Դաշնային պահուստային համակարգի որոշումը դոմինոյի էֆեկտ է թողնում համաշխարհային տնտեսության վրա, խստացման տեմպերի դանդաղեցումը կդրդի Եվրոպայի, Մեծ Բրիտանիայի, Կանադայի և Ավստրալիայի կենտրոնական բանկերին նման որոշում կայացնելու։ Ողջ աշխարհում դրամավարկային քաղաքականության մեղմացումը և ազգային արժույթների թուլացումը հատկապես բարենպաստ են ոսկի ներդրողների համար:

Ընդհանուր առմամբ, ոսկու և դոլարի միջև հակադարձ կապ կա։ Տոկոսադրույքների աճը դրդում է ներդրողներին իրենց կապիտալը տեղափոխել 0%-անոց ոսկուց դեպի արտարժույթներ, հատկապես ԱՄՆ-ում, որտեղ Դաշնային պահուստը անցել է դրամավարկային քաղաքականության խստացման ագրեսիվ ռազմավարության:

Հարկ է նշել, որ այս տարվա երրորդ եռամսյակում համաշխարհային կենտրոնական բանկերը գնել են 20 մլրդ դոլարի 400 տոննա ոսկի, ինչը ռեկորդային ցուցանիշ է։