2022 թվականին Վրաստանի բնակչության միջին ամսական եկամուտների ծավալը [դրամական և ոչ դրամական միջոցներ] աճել է 17 տոկոսով։

Մասնավորապես, Geostat-ի տվյալներով՝ 2022 թվականին Վրաստանի բնակչության միջին ամսական եկամուտը կազմել է 1 596,1 մլն լարի, ինչը 17,3 տոկոսով ավելի է 2021 թվականի համանման ցուցանիշից։

Մեկ տնային տնտեսության միջին ամսական եկամուտն աճել է 19%-ով և կազմել 1453.8 լարի, իսկ մեկ անձի հաշվով աճել է 18.6%-ով և կազմել 432.7 լարի։ Ըստ հետազոտության արդյունքների՝ տնային տնտեսությունների եկամտի հիմնական աղբյուրը կանխիկ եկամուտներն ու փոխանցումներն են, որոնց տեսակարար կշիռը 2022 թվականին, նախորդ տարվա համեմատ, աճել է 0,9 տոկոսային կետով և կազմել 86,9%։

Երկրի բնակչության ընդհանուր միջին ամսական եկամուտը քաղաքատիպ բնակավայրերում աճել է 15%-ով և կազմել 967,9 մլն լարի, իսկ գյուղական բնակավայրերում աճել է 21,4%-ով և կազմել 628,1 մլն լարի։

2022 թվականին դրամական եկամուտների և տրանսֆերտների կառուցվածքում զգալի մասնաբաժին ունեն վարձու աշխատանքից ստացված եկամուտները, որոնց տեսակարար կշիռը նախորդ տարվա նույն ցուցանիշի համեմատ աճել է 0,2 տոկոսային կետով և կազմել 46%։ 2,2 տոկոսային կետով աճել է նաև ինքնազբաղվածությունից ստացված եկամուտների տեսակարար կշիռը և հավասար է 12,4 տոկոսի։ Թոշակներից, կրթաթոշակներից և սոցիալական օգնությունից ստացված եկամուտների տեսակարար կշիռը նախորդ տարվա համեմատ նվազել է 1.0 տոկոսային կետով և կազմել 21.6 տոկոս։

2022 թվականին Վրաստանի բնակչության միջին ամսական ծախսերը կազմել են 1551,9 մլն լարի, ինչը 20,3 տոկոսով ավելի է նախորդ տարվա համապատասխան ցուցանիշից։

Երկրի բնակչության ընդհանուր ծախսերը քաղաքատիպ բնակավայրերում աճել են 19,2%-ով և կազմել 951,5 մլն լարի, իսկ գյուղական բնակավայրերում աճել են 22,2%-ով և կազմել 600,4 մլն լարի։