Դատարանը պետական բյուջեի մեծ գումարի վատնման գործով Միխեիլ Սաակաշվիլիին մեղավոր ճանաչեց։ Նշված հանցագործության համար նրան սահմանվեց 9 տարվա ազատազրկում։

Դատարանը նաև մեղավոր ճանաչեց նույն գործով մեղադրվող Պետական անվտանգության հատուկ ծառայության նախկին ղեկավար Թեմուր Ջանաշիային, սակայն, ինչպես պարզաբանեց դատավորը, Ջանաշիայի մեղադրանքը վերաորակավորվեց, և նրան նշանակվեց 300 հազար լարիի տուգանք։

Երկու մեղադրյալների համար մեղադրական դատավճիռը հայտարարեց Թբիլիսիի քաղաքային դատարանի դատավոր Բադրի Կոչլամազաշվիլին։

Դատավոր Բադրի Կոչլամազաշվիլին մինչ այդ պարզաբանել էր, որ նիստը չէր կարող հետաձգվել մեղադրյալների չներկայանալու պատճառով, քանի որ դա նախատեսված չէ Վրաստանի օրենսդրությամբ։

«Միխեիլ Սաակաշվիլին ճանաչվի մեղավոր Վրաստանի Քրեական օրենսգրքի 182-րդ հոդվածի երկրորդ մասի «բ» կետով և երրորդ մասի «բ» կետով կատարված հանցագործության համար և սահմանվի 9 տարվա ազատազրկում։

Միևնույն ժամանակ, նրան երեք տարով կարգելվի զբաղեցնել պետական ծառայության նշանակովի պաշտոններ։

Վրաստանի Քրեական օրենսգրքի 59-րդ հոդվածի չորրորդ մասի համաձայն, այս դատավճռով նշանակված պատիժը կներառի 2021 թվականի նոյեմբերի 17-ի քաղաքային դատարանի որոշմամբ սահմանված պատիժը, և վերջնական պատիժը կլինի 9 տարվա ազատազրկում՝ պետական ծառայության նշանակովի պաշտոնի զբաղեցման իրավունքից երեք տարով զրկմամբ։

Միխեիլ Սաակաշվիլիի ազատազրկման ժամկետի հաշվարկը կսկսվի այս դատավճռի ընդունման պահից՝ 2025 թվականի մարտի 12-ից, իսկ պատժի հաշվարկի մեջ կներառվի 2021 թվականի հոկտեմբերի 1-ից մինչև 2025 թվականի մարտի 12-ը կալանքի տակ գտնվելու ժամանակահատվածը», – հայտարարեց դատավորը։

Միխեիլ Սաակաշվիլիի և Թեմուր Ջանաշիայի նկատմամբ քննությունը վերաբերում է պետական բյուջեի շուրջ 9 միլիոն լարիի վատնմանը՝ անձնական նպատակների համար։

Ըստ դատախազության, քննության ընթացքում պարզվել է, որ Վրաստանի նախագահ Միխեիլ Սաակաշվիլին, Պետական անվտանգության հատուկ ծառայության ղեկավար Թեյմուրազ Ջանաշիայի և Օթար Քվելիձեի մասնակցությամբ, բյուջետային միջոցների ոչ նպատակային օգտագործման փաստերը գաղտնի պահելու նպատակով, նախագահի պահուստային ֆոնդից հատկացումներ է արել իր անմիջական ենթակայության տակ գտնվող Պետական անվտանգության հատուկ ծառայությանը։

Վրաստանի նախկին նախագահ Միխեիլ Սաակաշվիլին ձերբակալվել է Վրաստանի ներքին գործերի նախարարության կողմից 2021 թվականի հոկտեմբերի 1-ին, և նույն օրը նրան մեղադրանք է ներկայացվել սահմանը ապօրինի հատելու համար։