Վրաստանում այսօր նշում են մայրերի օրը:

Մայրերի օրը – մարտի 3-ը սահմանել է Վրաստանի առաջին նախագահ Զվիադ Գամսախուրդիան: Առաջին նախագահի որոշումը 1991 թվականին հաստատել է Վրաստանի գերագույն խորհուրդը: 

«Մայրության օրը» պետք է փոխարիներ Միջազգային կանանց օրվան, որը նշվում էր Խորհրդային Միությունում։ Սակայն, արդյունքում Վրաստանում տոնական օրեր հայտարարվեցին և՛ «Մայրության օրը»՝ մարտի 3-ը, և՛ Միջազգային կանանց օրը՝ մարտի 8-ը։

Մայրության օրը առաջին անգամ սահմանվեց Ամերիկայում 20-րդ դարի սկզբին՝ խաղաղության ակտիվիստ Աննա Ջարվիսի ջանքերով։ Նա իր արշավը սկսեց 1905 թվականի մայիսի 10-ին՝ իր մոր մահվան օրը, և 1908 թվականին հասավ նրան, որ Մայրության օրը պաշտոնապես ճանաչվեց որպես տոն։ Հետագայում Աննա Ջարվիսը սկսեց պայքարել այս օրվա կոմերցիալացման դեմ, քանի որ բազմաթիվ ընկերություններ մեծ շահույթ էին ստանում շնորհավորական բացիկների, ծաղիկների և այլ նվերների վաճառքից։

Աննա Ջարվիսը մահացավ 87 տարեկան հասակում՝ միայնակ և առանց երեխաների։ Ջարվիսի հիմնադրած տոնը շուտով ընդունվեց նաև այլ երկրների կողմից, և այժմ այն նշվում է ամբողջ աշխարհում։