Վրաստանի Հիվանդությունների վերահսկման ազգային կենտրոնի տնօրեն Ամիրան Գամկղրելիձեի հայտարարությամբ՝ հաջորդ շաբաթ Հիվանդությունների վերահսկման ազգային կենտրոնը միջգերատեսչական խորհրդին դիմելու է նախաձեռնությամբ, որը ենթադրում է լրիվ պատվաստման կուրսն անցած քաղաքացիների համար հատուկ արտոնությունների սահմանում: Հավելում է Ալիք Մեդիան:

Գամկղրելիձեի խոսքով՝ 2 անգամ պատվաստված քաղաքացիները պետությունից պետք է ավելի շատ խթան և արտոնություններ ստանան:

«Հիվանդությունների վերահսկման կենտրոնը համապատասխան նախաձեռնությամբ դիմելու է միջգերատեսչական խորհրդին, որ պատվաստված անձինք հատուկ արտոնություններ ունենան՝ օրինակ «պարետային ժամին» ազատ տեղաշարժ , արտերկրում ճանապարհորդելու համապատասխան փաստաթուղթ և այլն: Եվս մի քանիսի շուրջ աշխատում ենք»,- հայտարարել է Գամկղրելիձեն:

Մասնավորապես, հնարավոր է, որ պատվաստված քաղաքացիներին թույլատրվի փողոցում դիմակներ չկրել և չհետևել պարետային ժամին:

Գամկղրելիձեի խոսքով՝ մինչև մայիսի 15-ը երկրում շուրջ 14000 մարդ կլինի, որոնք 2 անգամ պատվաստված կլինեն կորոնավիրուսի դեմ: