Հոկտեմբերի 12–ից շրջափակման մեջ հայտնված 6 ընկերներով ամեն ինչ արել են ողջ մնալու համար ու ողջ ընթացքում ձեռքի տակ միայն բրինձ են ունեցել և կերել։

Արցախի նախագահ Արայիկ Հարությունյանը և ՀՀ փոխվարչապետ Տիգրան Ավինյանն այցելել են ավելի քան 70 օր անհետ կորած համարվող և թշնամու վերահսկողության տակ անցած տարածքներում գտնված 6 զինծառայողներին, հետաքրքրվել տղաների առողջությամբ։

Տղաները Հարությունյանի հետ զրույցում նշել են, որ արդեն ապաքինվում են, դե իսկ բոլոր հարազատները գիտեն հրաշալի նորության մասին։

Նախագահի հարցին, որ գյուղից դուրս էիք եկել, ի՞նչ էիք ուտում, տղաները ժպիտով են պատասխանում։

«Գյուղերից մեկի տներից ինչքան հնարավոր էր` բրինձ էինք հավաքել, 5 լիտրանոց ձեթ էինք գտել ու 10 օրվա համար բրինձ եփել, որը կերանք մոտ 15 օրում »,–պատմեց զինվորներից մեկը։

Նախագահը ճշտելու համար հարցրեց` ստացվում է` հիմնականում բրինձ եք կերե՞լ։

«Ոչ թե հիմնականում, այլ միայն բրինձ ենք կերել»,–ասաց զինծառայողներից մեկը։

Նախագահը խոստացավ, որ տղաները կստանան անհրաժեշտ բուժօգնություն` որ երկրում էլ պետք լինի։

Հիշեցնենք` երեկ հայտնի դարձավ, որ անհետ կորած զինծառայողներից 6–ին ողջ են գտել թշնամու վերահսկողության տակ անցած տարածքներում։

Ստեփանակերտի հիվանդանոցի մոտ տղաներին դիմավորեցին Արցախի նախագահն ու բարձրաստիճան պաշտոնյաներ։