Հակառակորդն այսօր արդեն քանի անգամ հարվածել է մայրաքաղաքին` շարունակելով թիրախավորել խաղաղ բնակչությանը։
ՀՀ ՊՆ ներկայացուցիչ Արծրուն Հովհաննիսյանը Facebook–ի իր էջում տեղեկացնում է, որ կրկին հրթիռային հարված է հասցվել Ստեփանակերտ քաղաքին։

Sputnik Արմենիայի թղթակիցը Ստեփանակերտից հայտնում է, որ պայթյունի ձայներից կարելի է ենթադրել, որ «Սմերչ» է կիրառվել։

Նշենք, որ Արցախի մայրաքաղաքը հրթաիռակոծում են ճիշտ այն ժամանակ, երբ Ռուսաստանում տեղի է ունենում Հայաստանի և Ադրբեջանի արտաքին գործերի նախարարների հանդիպումը։

Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։

Հոկտեմբերի 9-ի ժամը 11։00-ի դրությամբ` հակառակորդի կրակոցների հետևանքով զոհվել են 350 զինծառայողներ և 20 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 4369 զոհ ունի, ավելի քան 5000 վիրավոր։

Ըստ վերջին տվյալների՝ Ադրբեջանի զինված ուժերը կորցրել են 17 ինքնաթիռ, 16 ուղղաթիռ, 162 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 508 տանկ և ՀՄՄ: