Չինաստանում երկարատև անձրևները մեծ ջրհեղեղների պատճառ են դարձել. ավելի քան 80 հազար մարդ տարհանվել է: Այս մասին հայտնում է REUTERS- ը:
Աղետը պատուհասել է Չինաստանի հարավ -արևմուտքում գտնվող Սիչուան նահանգը: Դաչժոու քաղաքի ջրամբարում ջրի մակարդակը նորմայից բարձրացել է 2.2 մետրով:

Հնդկաստանի հյուսիսում Ուտտար -Պրադեշ նահանգի մոտ 357 գյուղեր հեղեղվել են հորդառատ անձրևներից, հաղորդում է NDTV- ն:

Գոնդա քաղաքի տարածքում գետի ջրի մակարդակի բարձրացումից ջուրը լցվել է տարրական դպրոց: Ջրհեղեղներից տուժած գյուղերի մեկ երրորդն ամբողջովին կտրվել է մնացյալ տարածքից:

Գերմանիայի արևմտյան մասում ջրհեղեղները խլել են Գերմանիայում մշտապես բնակվող երեք ռուսների կյանք: Այս մասին «Իզվեստիա» թերթին տված հարցազրույցում հայտարարել է Բեռլինում Ռուսաստանի դեսպան Սերգեյ Նեչաևը:

«Ավաղ, ողբերգությունը չի խնայել մեր հայրենակիցներին. Տեղական իրավապահ մարմիններից ստացված վերջին տվյալների համաձայն՝ բնական աղետի հետևանքով երեք ռուս, որոնք մշտապես բնակվում էին ԳԴՀ-ում, զոհվել են», – ասել է նա:

«Մենք մեր խորին ցավակցությունն ու զորակցությունն ենք հայտնում նրանց ընտանիքներին, հարազատներին և ընկերներին: Դեսպանատունը և Ռուսաստանի հյուպատոսական ներկայացուցչությունները շարունակում են ուշադիր հետևել իրավիճակին», – հավելել է դիվանագետը:

Դեսպանը նշել է, որ Գերմանիայի արևմտյան հատվածին պատուհասած աղետի հետևանքներն աննախադեպ են, և, փորձագետների գնահատմամբ, ավերված ենթակառուցվածքի վերականգնումը «կպահանջի շատ ժամանակ և բազմամիլիարդանոց ծախսեր»:

Հուլիսի կեսերին հորդառատ անձրևներ են տեղացել Գերմանիայի արևմուտքում և հարավ-արևմուտքում՝ ավերիչ ջրհեղեղների պատճառ դառնալով: Աղետից տուժած բոլոր բնակավայրերում զոհերի ընդհանուր թիվը գերազանցել է 180-ը, ավելի քան 750 մարդ վիրավորվել է: