Վրաստանի Ծալկայի շրջանի Աշխալա (Աշկալա) հայաբնակ գյուղում կորոնավիրուսի դեպք է արձանագրվել: Վարակվածը Վրաստան է եկել ՀՀ-ից, Մառնեուլիի շրջանում անցել 14-օրյա կարանտին։ Կարանտինն ավարտվելուն պես Աշխալայի բնակիչը թեստ է հանձնել ու բացասական պատասխանից հետո վերադարձել գյուղ:

Ըստ գյուղի բնակիչների՝ կարանտինի ընթացքում մոտ 30-ամյա տղամարդը ստուգվել է, առողջական վիճակը բավարար է եղել, ջերմություն չի արձանագրվել: Գյուղում մոտ երկու օր անցկացնելուց հետո բնակիչը ևս մեկ անգամ է թեստ հանձնել, արդյունքն այս անգամ՝ դրական:

Գյուղի բնակիչներն Ալիք Մեդիայի հետ զրույցում ասում են, որ վարակվածը շատերի հետ է շփում ունեցել գյուղում. նրա հետ շփվածներն էլ իրենց հերթին՝ մնացածի հետ: Աշխալայում շրջանառվող խոսակցությունների համաձայն՝ ի սկզբանե առաջին թեստի պատասխանը վարակաբանները շփոթել են այլ պացիենտի թեստի հետ:

«Հնարավոր է՝ գյուղը փակվի, կարանտինային ռեժիմի անցնի»,- ասում են աշխալացիները: Տեղում բնակիչներն անհանգստացած են, հատկապես նրանք, ովքեր ուղիղ կապ են ունեցել կորոնավիրուսով վարակվածի հետ:

Շրջանառվում է խոսակցություն, որ այս պահին պատրաստվում են վարակվածին տեղափոխել Թբիլիսի, մնացած մանրամասներն իմանալու համար սպասում են վաղվան:

Սովորաբար վերջին 24 ժամվա տվյալները հրապարակվում են ամենօրյա կտրվածքով՝ կեսօրին. ակնկալվում է, որ տեղի ունեցածի հետ կապված մանրամասն պաշտոնական տվյալներ կհրապարակվեն արդեն վաղը:

Հիշեցնենք՝ հուլիսի 12-ի դրությամբ Վրաստանում արձանագվել է կորոնավիրուսով վարակման 986, ապաքինման՝ 857 դեպք:

Aliq.ge