ՀՀ առողջապահության նախարարությունը Facebook-ի էջում հրապարակել է կորոնավիրուսի «Օմիկրոն» մանրէահիմքի ախտանշանները։

Համաձայն հետազոտությունների արդյունքների՝ «Օմիկրոն» տարբերակը հիվանդության ավելի թեթև ախտանշաններ է առաջացնում, քան կորոնավիրուսային հիվանդության մյուս տարբերակները: Այն ավելի շատ ախտահարում է վերին շնչուղիները՝ քիթը, կոկորդը և առավել հազվադեպ է առաջացնում թոքերի ախտահարում։

Կորոնավիրուսի օմիկրոն շտամի ամենավաղ ախտանշաններն են.

• կոկորդի ցավ,
• մեջքի ցավ,
• քթի փակվածություն,
• գլխացավ,
• հոգնածություն,
• փռշտալ,
• գիշերային քրտնարտադրություն
• մարմնի ցավեր:

Հաշվի առնելով, որ «Օմիկրոնի» ու սուր շնչառական վարակներին բնորոշ ախտանշանները նույնանման են, առողջապահության նախարարությունը հորդորում է նշված ախտանշանների ի հայտ գալու դեպքում դիմել պոլիկլինիկա՝ հիվանդությունը վաղ փուլում հայտնաբերելու և բարդություններից խուսափելու նպատակով։

Մասնագետները նշում են, որ «Օմիկրոնից» պաշտպանվելու ամենալավ տարբերակը Covid-19-ի դեմ պատվաստանյութի բուստեր դեղաչափն է: Առողջապահության նախարարությունը կոչ է անում պատվաստվել և կանխել հիվանդության բարդությունները: