Չինաստանի Ժողովրդական Հանրապետությունը Վրաստանի քաղաքացիների համար սահմանել է առանց վիզայի ռեժիմ։

Այս մասին կառավարության այսօրվա նիստում հայտարարել է Վրաստանի վարչապետ Իրակլի Կոբախիձեն։

Ինչպես նշեց վարչապետը, Վրաստանի քաղաքացիները Չինաստանում առանց վիզայի կարող են մնալ 30 օր։

«Չինաստանի Ժողովրդական Հանրապետությունը որոշում է կայացրել Վրաստանի քաղաքացիների համար առանց վիզայի ռեժիմ սահմանելու մասին։ Վրաստանի քաղաքացիները կկարողանան Չինաստանում 30 օր անընդմեջ անցկացնել առանց վիզայի։ Սա կարևոր որոշում է, որը կհեշտացնի մեր համաքաղաքացիների համար Չինաստան մեկնելը և նոր հնարավորություններ կստեղծի Վրաստանի և Չինաստանի միջև քաղաքական, տնտեսական և մշակութային կապերի հետագա զարգացման համար։ Այս որոշումը նախորդ տարի Վրաստանի և Չինաստանի միջև ստորագրված ռազմավարական գործընկերության համաձայնագրի ևս մեկ կարևոր գործնական արդյունք է։ Շնորհավորում եմ մեր համաքաղաքացիներին և ցանկանում եմ շնորհակալություն հայտնել իմ չինացի ընկերներին և Չինաստանի իշխանություններին այս կարևոր որոշման համար»,- ասել է Իրակլի Կոբախիձեն։

Հիշեցնենք, որ Չինաստանի քաղաքացիների համար առանց վիզայի ռեժիմը Վրաստանի կողմից սահմանվել է 2023 թվականի սեպտեմբերի 11-ից։

Բացի այդ, Վրաստանի և Չինաստանի միջև ռազմավարական գործընկերության մասին համաձայնագիրը ստորագրվել է 2023 թվականի հունիսին։