კათოლიკური ეკლესია უფლის გაცხადების დღესასწაულს აღნიშნავს

რელიგია

06.01.2025

6 იანვარს, დასავლეთის ქრისტიანული ეკლესიები უფლის გაცხადების დიდ დღესასწაულს აღნიშნავენ. ამ დღესასწაულს ასევე „ეპიფანიასაც“ უწოდებენ. მისი ერთ-ერთი გავრცელებული სახელწოდებაა "სამი მოგვის" ან "სამი მეფის დღესასწაული".

დღესასწაული ეკლესიაში III საუკუნიდან აღინიშნება და იგი სამი მოგვის შესახებ მათეს სახარების მონათხრობს უკავშირდება, რომლებიც აღმოსავლეთიდან მოვიდნენ და იესოს ოქრო, გუნდრუკი და მური მიართვეს.

ოქრო – როგორც მეფეს, გუნდრუკი – როგორც ღმერთს და მური – როგორც ადამიანს.

ამ დღეს, ასევე აღინიშნებოდა ქრისტეს შობის დღესასწაული. თუმცა IV საუკუნეში შობის დღესასწაულის აღნიშვნა 25 დეკემბერს გადაწყდა, ხოლო უფლის გაცხადების დღესასწაული – 6 იანვარს დარჩა.

ეს დღესასწაული ასრულებს ლიტურგიულ ჟამს და საშობაო დღესასწაულებს. ამ დღეს, კათოლიკეებს ევალებათ წმინდა წირვაზე დასწრება და იმ სამუშაოსგან თავის შეკავება, რომელიც ხელს უშლის უფლის მიმართ პატივისცემის გამოხატვას ან სიხარულის განცდას.

უფლის გაცხადების დღესასწაულზე ეკლესიებში იკურთხება ცარცი და გუნდრუკი, შემდგომ კი ისინი მორწმუნეებს სახლში მიაქვთ. ცარცით სახლის კარზე აწერენ სამ ასოს: კ + მ + ბ და მიმდინარე წელს.

რელიგიის საკითხთა სახელმწიფო სააგენტო კათოლიკურ ეკლესიას ღვთის განცხადების დღესასწაულს ულოცავს.

„ეპიფანია უძველესი ქრისტიანული დღესასწაულია და ქრისტესშობასა და მის თანმდევ მოვლენებს ეძღვნება. რელიგიის საკითხთა სახელმწიფო სააგენტო ულოცავს ლათინ კათოლიკეთა კავკასიის სამოციქულო ადმინისტრაციას, საქართველოში მცხოვრებ კათოლიკეებს დღესასწაულს და სიკეთეს, სიხარულს უსურვებს”,- ნათქვამია გავრცელებულ ინფორმაციაში.