უჩა ნანუაშვილის სამცხე–ჯავახეთში ვიზიტი ადიგენის მუნიციპალიტეტის სოფელ ჭელიდან დაიწყო, სახალხო დამცველი ადგილობრივ მუსლიმ მრევლს შეხვდა და მათი პრობლემები მოისმინა.

ჭელას შემდეგ სახალცო დამცველმა სოფელ მოხეში გადაინაცვლა,  სადაც მუსლიმ მოსახლეობასთან გასაუბრება ერთ–ერთი ადგილობრივის ოჯახში უნდა გამართულიყო.  გეგმები მართლმადიდებელი მრევლის თხოვნით შეიცვალა და ომბუდსმენმა  მიმდებარე 12 სოფლიდან შეკრებილ მოსახლეობას მოუსმინა.  მართლმადიდებლებმა სახალხო დამცველს სადავო შენობასთან დაკავშირებით არსებული პრობლემის მოგვარება სთხოვეს.

მართლმადიდებლების შემდეგ უჩა ნანუაშვილს ადგილობრივმა მუსლიმმა მოსახლეობამ უმასპინძლა. თემურ მიქელაძის ოჯახში შეკრებილი მუსლიმებიც, ქრისტიანების მსგავსად სადავო შენობის საკითხის გარკვევას მოითხოვენ. შეხვედრაზე აღინიშნა, რომ ორი რელიგიის წარმომადგენლებს შორის ურთიერთობა  მკვეთრად შეიცვალა, რაც ბოლო პერიოდში განვითარებულმა მოვლენებმა განაპირობა. მუსლიმები მოითხოვენ, მოხდეს დასაბუთება, რომ შენობა მეჩეთი არ არის.  ე.წ. მოხის კომისიის გადაწყვეტილებას – ახალი სალოცავის აშენების თაობაზე მხოლოდ ამის შემდეგ დათანხმდებიან.

უჩა ნანუაშვილის შეფასებით, მოხის პრობლემა გადაჭრილი არ არის. ამიტომ სახალხო დამცველი შესაბამის სტრუქტურებს რეკომენდაციით მიმართავს, რომ სადავო შენობის წარმომავლობა სპეციალისტებმა საფუძვლიანად შეისწავლონ.

სახალხო დამცველი სამცხე–ჯავახეთში ვიზიტს 8 დეკემბერს დაასრულებს. უჩა ნანუაშვილი ახალციხეში სტუდენტებს შეხვდება. ომბუდსმენი მათ სახალხო დამცველის აპარატის მანდატს,  ადამიანის უფლებების კუთხით ქვეყანაში არსებულ მთავარ გამოწვევებსა და მიღწევებს გააცნობს. ამის შემდეგ სახალხო დამცველს ახალციხისა და ტაო–კლარტეთის მიტროპოლიტი უმასპინძლებს.

ავტორები: თიკო კურტანიძე, ლევან ყურაშვილი