გოჩა ჯეირანაშვილის კანდიდატურას დეპუტატებმა მხარი არ დაუჭირეს

პოლიტიკა

12.12.2019

იურიდიულ საკითხთა კომიტეტმა უზენაესი სასამართლოს მოსამართლეობის კანდიდატებს კენჭი უყარა. დეპუტატებმა წარმოდგენილი 20 კანდიდატიდან მხარი 14 მათგანს დაუჭირეს, მათ შორის არიან გენერალური პროკურორი შალვა თადუმაძე და მისი მოადგილე მამუკა ვასაძე.

რეკომენდაცია არ გაუწიეს ექვს კანდიდატს - თამარ ალანიას, შოთა გეწაძეს, ზაზა თავაძეს, პაატა სილაგაძეს, ლაშა ქოჩიაშვილსა და გოჩა ჯეირანაშვილს.

იურიდიულ საკითხთა კომიტეტმა მხარი უზენაესი სასამართლოს მოსამართლეობის შემდეგ კანდიდატებს დაუჭირა: მერაბ გაბინაშვილი - 7 ხმა, მირანდა ერემაძე - 6 ხმა, მამუკა ვასაძე - 7 ხმა, მაია ვაჩაძე - 7 ხმა, თამარ ზამბახიძე - 8 ხმა, შალვა თადუმაძე - 8 ხმა, ვლადიმერ კაკაბაძე - 6 ხმა, ლევან მიქაბერიძე - 6 ხმა, გიორგი მიქაუტაძე - 8 ხმა, ნუგზარ სხირტლაძე - 6 ხმა, ლალი ფაფიაშვილი - 7 ხმა, ნინო ქადაგიძე - 7 ხმა, ქეთევან ცინცაძე - 6 ხმა, ალექსანდრე წულაძე - 6 ხმა.

კომიტეტმა ჩააგდო შემდეგი კანდიდატები: თამარ ალანია - 1 ხმა, ლაშა ქოჩიაშვილი - 1 ხმა, ზაზა თავაძე - 0 ხმა, შოთა გეწაძე - 1, პაატა სილაგაძე - 2 ხმა და ახალციხის რაიონული სასამართლოს ყოფილი თავმჯდომარე გოჩა ჯეირანაშვილი - 1 ხმა. ოპოზიცია არჩევნებში არ მონაწილეობდა, კანდიდატების წინააღმდეგ ხმას მხოლოდ ეკა ბესელია აძლევდა.

ამის შემდეგ, მოსამართლეობის კანდიდატებს კენჭი პლენარულ სხდომაზე უნდა უყარონ. კომიტეტის ამ გადაწყვეტილებას დამოუკიდებელი და ოპოზიციონერი დეპუტატები აპროტესტებენ. მათი მოთხოვნა იყო, რომ მხარი არც ერთი კანდიდატისთვის არ დაეჭირათ, რადგან მათივე შეფასებით, მხარდაჭერილი მოსამართლეები პოლიტიკური დავალებების შემსრულებლები და უკანონო გადაწყვეტილებების მიმღებნი არიან.

კომიტეტის სხდომა ხმაურის ფონზე წარიმართა. ადგილი ჰქონდა ფიზიკურ შეხლა -შემოხლასაც. კომიტეტზე ხმაური მას შემდეგ დაიწყო, რაც "ნაციონალური მოძრაობის" წევრმა თინა ბოკუჩავამ უმრავლესობას „მონები“ უწოდა, ხოლო დეპუტატი ეკა ბესელია კომიტეტის თავმჯდომარეს სთხოვდა, მისთვის განცხადების გაკეთების საშუალება კიდევ ერთხელ მიეცა, უარის მიღების შემდეგ კი ტრიბუნაზე, ანრი ოხანაშვილის ადგილთან ავიდა. კომიტეტის თავმჯდომარემ ტექნიკური შესვენება გამოაცხადა, მანდატურებმა კი მედიის წარმომადგენლების დარბაზიდან გაყვანა ძალის გამოყენებით სცადეს. რამდენიმე წუთში კი კომიტეტის სხდომა კვლავ განახლდა, რის შემდეგაც კენჭისყრა გაიმართა.