მიღებული ვერსია ფიზიკურ პირებსაც ეხება, ჯარიმა 5 ათასი ლარია - რა შეიცვალა „გამჭვირვალობის შესახებ“ კანონში?

პოლიტიკა

18.05.2024

პარლამენტმა "უცხოური გავლენის გამჭვირვალობის შესახებ" კანონპროექტის ბევრად უფრო მძიმე ვერსია მიიღო, ვიდრე პროექტის პირვანდელი ვარიანტი იყო - ყველაზე საგანგაშოა ის, რომ ეს არის მალულად ჩამატებული მუხლები და მასზე კომიტეტის ფარგლებში მსჯელობა არც ყოფილა! ეს არის კიდევ ერთი ნიშანი იმისა, თუ როგორ შეიძლება კანონი ხელისუფლებამ თანდათან დაამძიმოს და შეახოს ყველას, ვინც განსხვავებულ პოზიციას დააფიქსირებს, - ამის შესახებ "ინტერპრესნიუსთან" "ახალგაზრდა იურისტთა ასოციაციის" ხელმძღვანელი ნონა ქურდოვანიძე საუბრობს.

ქურდოვანიძის თქმით, კანონის პროექტის საბოლოო ვარიანტში ასახული ცვლილების თანახმად, იუსტიციის სამინისტროს უფლება ექნება, ყველა პირს პერსონალური ინფორმაციის წარდგენა მოსთხოვოს და მისი წარუდგენლობისთვის 5 000 ლარით დააჯარიმოს.

საია-ს ხელმძღვანელი აცხადებს, ეს იმას ნიშნავს, რომ თუ უკანონოდ დაჯარიმებული პირი სასამართლოში საჩივარს შეიტანს, ვალდებული ხდება, ვიდრე სასამართლო გადაწყვეტილებას მიიღებს, ჯარიმა მაინც გადაიხადოს, რაც სასამართლოში დავას აზრს უკარგავს.

,,მას შემდეგ, რაც ეს ცვლილება აღმოვაჩინეთ, ვნახეთ პლენარული სხდომის ჩანაწერი მეორე მოსმენით განხილვისას - როგორც ჩანს, მეორე მოსმენისას, პლენარულ სხდომაზე ჩასწორებული ვერსია წარადგინეს, რადგან პროექტის სესიაზე წარდგენისას წარმდგენი ამბობს, რომ ამგვარი ცვლილებები არის ასახული.

ეს შოკისმომგვრელია, რადგან ასეთ ცვლილებებზე საკომიტეტო განხილვის ფარგლებში საუბარი საერთოდ არ ყოფილა - "ქართული ოცნების" არც ერთ დეპუტატს ამაზე არაფერი არ უთქვამს.

ეს ჩანაწერები კიდევ უფრო აუარესებს და ამძიმებს კანონპროექტს, რადგან არამხოლოდ იურიდიული, არამედ ფიზიკური პირების პასუხისმგებლობასაც ადგენს.

საბოლოო მოსმენით მიღებული კანონპროექტი უკვე ეხება ფიზიკურ პირებს", - განაცხადა ნონა ქურდოვანიძემ.

საია-ს ხელმძღვანელის შეფასებით, კანონპროექტში გაკეთებული დამამძიმებელი ჩანაწერები კიდევ უფრო მეტად ქმნის ისეთ რეალობას, რომ პერსონალური მონაცემების დაცვას ძალიან დიდი კითხვის ნიშნის ქვეშ აყენებს.