თუ თქვენი [საპრეზიდენტო] კანდიდატი ვიქნები, ძალიან ბედნიერი და ამაყი ვიქნები - ზურაბიშვილი ახალგაზრდებს

პოლიტიკა

12.06.2024

პრეზიდენტ სალომე ზურაბიშვილი ამბობს, რომ მისი საპრეზიდენტო ვადის ამოწურვის შემდეგ "იქნება იქ, სადაც საჭირო იქნება". ამასთან, ახალგაზრდებთან შეხვედრისას, ღონისძიებაზე შეკრებილებს მიმართავს, რომ "თუ იქნება მათი კანდიდატი, ძალიან ბედნიერი და ამაყი იქნება".

ამის შესახებ მან ერთ-ერთი ახალგაზრდის მიერ დასმული კითხვის პასუხად ისაუბრა იმის შესახებ, "მიიღებს თუ არა საპრეზიდენტო არჩევნებში მონაწილეობას იმ შემთხვევაში თუ მისი კანდიდატის ირგვლივ კონსენსუსი იქნება".

"არ ვიცი, ვისი კონსენსუსი იქნება, ეს იქნება პარტიების, რომლებიც ხელს აწერენ ქართულ ქარტიაზე, თუ საზოგადოებაში გამოხატული კონსენსუსი. კიდევ ვიმეორებ, რომ იქ ვიქნები, სადაც საჭირო ვიქნები, სადაც საჭირო იქნება იმისთვის, რომ მივიყვანოთ ეს საქმე ბოლომდე. ჩემთვის ამ საქმის ბოლომდე მიყვანა ერთის მხრივ, არჩევნებში გამარჯვებაა, შემდეგ ქარტიის შესრულება მოკლე დროში. არ უნდა დიდი დრო, გადამოწმებულია. უნდა შევძლოთ, მე მინდა ვიყო ადამიანი, რომელიც დაიცავს ამ შედეგს, მიიტანს ბრიუსელამდე და ჩვენ გაგვიხსნიან [ევროკავშირში გაწევრიანების] მოლაპარაკებებს. ეს იქნება პრეზიდენტის თუ სხვა როლში, მომავალი გვიჩვენებს. თუ ვიქნები თქვენი კანდიდატი, ძალიან ბედნიერი და ამაყი ვიქნები", - თქვა სალომე ზურაბიშვილმა.

11 ივნისს პრეზიდენტი სალომე ზურაბიშვილი ახალგაზრდებს შეხვდა. ღონისძიების გახსნისას მან შეკრებილებს სიტყვით მიმართა და მადლობა გადაუხადა გაწეული საქმისთვის, რომ მსოფლიოს აჩვენეს "საქართველოს სხვა მომავალი არ შეიძლება ჰქონდეს, თუ არა ევროპული და ქართული".

პრეზიდენტის ინიციატივას, „ქართულ ქარტიას“, 17 პოლიტიკური პარტია და ხუთი დამოუკიდებელი დეპუტატი აწერენ ხელს. ცნობილია, რომ „ქართულ ქარტიას“ არ უერთდებიან "საქართველოსთვის“, „გირჩი“ და „ლეიბორისტული პარტია“.