ორგანიზაციებს გრანტის მისაღებად მთავრობის ნებართვა დასჭირდებათ - „ოცნების“ კანონპროექტი

პოლიტიკა

08.04.2025

„ქართულმა ოცნებამ“ სადავო პარლამენტში კიდევ ერთი კანონპროექტი დააინიციირა, რომლის მიხედვითაც, ორგანიზაცია გრანტს ვერ მიიღებს, თუ მას არ ექნება „მთავრობის ან მთავრობის მიერ განსაზღვრული უფლებამოსილი პირის/ორგანოს თანხმობა“. დონორი ორგანიზაცია ვალდებული იქნება, წარადგინოს ხელშეკრულების პროექტი.

„გრანტების შესახებ“ კანონში ჩნდება „აკრძალული გრანტის“ ცნება - ანუ დონორის მიერ ორგანიზაციის დაფინანსება, თუ მას არ ექნება მთავრობის თანხმობა.

„ეს წესი არ ვრცელდება საერთაშორისო სპორტული ასოციაციის, ფედერაციის და კომიტეტის მიერ გრანტის გაცემაზე, საქართველოს საზღვრებს გარეთ საშუალო და უმაღლესი განათლების მიღებისთვის და სამეცნიერო მუშაობისთვის გაცემულ ინდივიდუალურ სტიპენდიაზე, ისევე როგორც საქართველოში მოქმედი საერთაშორისო ორგანიზაციის მიერ გრანტის მიღებაზე“, - წერია კანონპროექტში.

გრანტის გაცემისა და მიღების „კანონიერებას“ ანტიკორუფციული ბიურო შეამოწმებს. მას შეეძლება, გამოითხოვოს ფინანსური ანგარიში და გამოჰკითხოს ადამიანები.

„აკრძალული გრანტის მიღება გამოიწვევს გრანტის მიმღების დაჯარიმებას აღნიშნული გრანტის ორმაგი ოდენობით“, - წერია კანონპროექტში, რომელშიც ასევე აღნიშნულია, რომ თუ პირი ცრუ ჩვენებას მისცემს, მას 2000 ლარით დააჯარიმებენ.

კანონპროექტი დაჩქარებული სახით უნდა განიხილონ, რაც მის მიღებას ერთ კვირაში ხდის შესაძლებელს. დოკუმენტი ამოქმედდება გამოქვეყნებისთანავე.

ხელისუფლებისგან დამოუკიდებელი ქართული არასამთავრობო და მედიაორგანიზაციების უმრავლესობა უცხოეთიდან მიღებული გრანტებით ახორციელებს პროექტებს. მათ შესაზღუდად „ქართულმა ოცნებამ“ არაერთი კანონი მიიღო - მათ შორის, „აგენტების კანონი“ და „უცხოური აგენტების რეგისტრაციის აქტი“. დამატებით მაუწყებლებისთვის შეზღუდა უცხოეთიდან დაფინანსებული პროექტების განთავსება.

თეგები: გრანტები / კანონპროექტი / ოცნება /

Հեղինակ:

Tv9news

Երկ.

Երեք.

Չոր.

Հինգ.

Ուրբ.

Շաբ.

Կիր.