უძრავი ქონების სექტორი გაურკვეველი ვადით დაპაუზდა

ეკონომიკა

17.01.2025

უძრავი ქონების ბაზარი ცოცხალი ორგანიზმია და გარე გამღიზიანებლებზე ძალიან იოლად რეაგირებს. ყველაზე მნიშვნელოვანი ფაქტორი ამ გამღიზიანებლებს შორის სწორედ პოლიტიკური ფაქტორია - ამის შესახებ „პალიტრანიუსისა“ და რადიო „პალიტრას“ გადაცემაში „საქმე“ "რე/მაქს რეალთი პარკის" მმართველმა პარტნიორმა მარიამ სურგულაძემ განაცხადა.

მისივე თქმით, ქვეყანაში მიმდინარე პროცესები სექტორზე მაინც ნეგატიურად აისახება.

„2024 წელი უძრავი ქონების ბაზრისთვის საკმაოდ მძიმე იყო. ამას რამდენიმე მიზეზი ჰქონდა, ერთი, რომ ქვეყანა იმყოფებოდა წინასაარჩევნო რეჟიმში და შესაბამისად, მომხმარებლის ქცევა და მოთხოვნაც საკმაოდ თავშეკავებული იყო. მიუხედავად ამისა, მკვლევარებმა მაინც დააფიქსირეს ფასის წლიური 7%-იანი ზრდა, რაც ძირითადად განპირობებული იყო მშენებლობის თვითღირებულებების გაძვირებით.

მეორე - 2024 წელს ძალიან ნეგატიური როლი ითამაშა იმ საპროტესტო ტალღებმა, რომელიც პირველად გაზაფხულზე აგორდა, რაც ე.წ. რუსული კანონის მიღებას მოჰყვა. შემდეგ კი მოჰყვა არჩევნების შედეგით და ევროინტეგრაციით პროცესის შეფერხების განცხადებით გამოწვეული აფეთქება, რომელიც დღემდე უწყვეტ რეჟიმში მიმდინარეობს და რომელმაც გაურკვეველი ვადით სრულიად დააპაუზა უძრავი ქონების სექტორი“, - განაცხადა „საქმეში“ მარიამ სურგულაძემ.

რაც შეეხება მიმდინარე წლის მოლოდინებს, სურგულაძე ამბობს, რომ 2025-იც არასახარბიელოდ დაიწყო.

„სამწუხაროდ, ჩვენს ბაზარს კრიზისების და რყევების გამოცდილება საკმაოდ აქვს დაგროვილი. მაგრამ საბედნიეროდ, სანქცირების გამოცდილება ნამდვილად არ გვაქვს და არც ჩვენს ბაზარს არ განუცდია ამის სიმძაფრე. სწორედ ამით აიხსნება ის ფაქტიც, რომ მთლად ბოლომდე ვერ ვაცნობიერებთ იმ ნეგატიურ ეკონომიკურ ეფექტებს, რაც ამ სანქცირებას შეიძლება მოჰყვეს.

მიუხედავად იმისა, რომ სანქციები არ არის საყოველთაო და მიმართულია კონკრეტულ პერსონებზე, ეს ძალიან რეპუტაციული რისკის შემცველია თავად ქვეყნისთვის და რა თქმა უნდა, ჩვენი სექტორისთვისაც. ეს რეპუტაციული რისკები პირდაპირი გზავნილია საერთაშორისო ინვესტორებისთვის, რომ უფრო მეტი სიფრთხილით მოეკიდონ ისეთ ქვეყნებში ინვესტიციების ჩადებას, რომელიც დიდი სტაბილურობით და უსაფრთხოების გარანტიებით არ გამოირჩევა.

ჩვენმა სექტორმა ეს პროცესი, 2024 წლიდან დღემდე საკუთარ თავზე ვიწვნიეთ. როგორც მოგეხსენებათ, “რე/მაქს რეალთი“ საერთაშორისო კომპანიაა და არის უმსხვილესი გლობალური ბრენდის „რე/მაქსის“ ფრენჩაიზერი საქართველოში. ჩვენი მომხმარებლების უმრავლესობა საერთაშორისო ინვესტორია. 2024 წლიდან მოყოლებული ძალიან ნათლად დავინახეთ როგორი იყო ამ მომხმარებლის დამოკიდებულება და როგორ იცვლებოდა მათი ქცევა ინვესტირებასთან დაკავშირებით.

ვთვლი და იმედი მაქვს, რომ ჩვენმა ხელისუფლებამაც გარკვეული პასუხისმგებლობა უნდა აიღოს საკუთარ თავზე და რაღაცნაირად შეაჩეროს ეს პროცესი. რადგან, რაც უფრო ღრმად წავა სანქციები, მით უფრო დამაზიანებელი იქნება, არა მხოლოდ იმ კონკრეტული პირებისთვის, არამედ ზოგადად ქვეყნისთვის. ქვეყნის ინტერესი კი უფრო მთავარია ამ სიტუაციაში, ვიდრე კერძო, ვიწრო ინტერესები“, - განაცხადა „საქმეში“ სურგულაძემ.

შეგახსენებთ, რომ უკვე 50-ე დღეა საქართველოში საპროტესტო აქციები მიმდინარეობს. ამის მიზეზი ირაკლი კობახიძის განცხადება გახდა, რომლის მიხედვითაც მთავრობა ევროკავშირის მხრიდან ყოველგვარ საბიუჯეტო გრანტზე 2028 წლის ბოლომდე უარს ამბობს. ასევე კობახიძის 28 ნოემბერს გაკეთებული განცხადების თანახმად, "ქართული ოცნების" გუნდი ევროკავშირში ინტეგრაციისთვის მოლაპარაკებების პროცესს არ დაიწყებს.

ამასთან, დამსაქმებლებმა და დასაქმებულებმა, 15 იანვარს 15:00-დან 18:00 საათამდე საყოველთაო გამაფრთხილებელი გაფიცვა მოაწყვეს. როგორც ორგანიზატორები აცხადებენ, პროტესტის მიზანი იყო, ეჩვენებინათ საზოგადოებისთვის ის, თუ რა ელის საქართველოს იზოლაციის პირობებში.

თეგები: მარიამ სურგულაძე / უძრავი ქონება /

Հեղինակ:

მეცხრე არხი