ახალციხეში აფხაზეთის ომში დაღუპული გმირები გაიხსენეს

საზოგადოება

14.08.2023

ახალციხის ცენტრალურ პარკში, საქართველოს ერთიანობისთვის ბრძოლაში დაღუპულ გმირთა მემორიალი ყვავილებით შეამკეს და მათ ხსოვნას კიდევ ერთხელ პატივი მიაგეს. გარდაცვლილთა სულების მოსახსენიებელი პანაშვიდი დეკანოზმა მამა იოანე გელაშვილმა გადაიხადა.

დღეს, 14 აგვისტოს, აფხაზეთის ომის დაწყებიდან 31 წელი გავიდა. ომმა, რომელიც 13 თვეს და 13 დღეს გაგრძელდა, სხვადასხვა მონაცემით, 10 ათასიდან 30 ათასამდე სამხედრო და სამოქალაქო პირის სიცოცხლე შეიწირა. ამ დღესთან დაკავშირებით, ახალციხის ცენტრალურ პარკში, მოქალაქეებმა, ომის ვეტერანებმა და ადგილობრივი თვითმმართველობის წარმომადგენლებმა მემორიალი ყვავილებით შეამკეს.

"31 წელი გავიდა აფხაზეთის უმძიმესი ომის დაწყებიდან. ომმა 300 000 ადამიანი დევნილად აქცია საკუთარ ქვეყანაში. ომმა მრავალი ადამიანი აქცია გმირებად. არიან დაღუპულები. ჩვენ, თითოეული მოქალაქე ვალდებული ვართ გვახსოვდეს ეს ყველაფერი და გავძლიერდეთ იმისთვის, რომ გაერთიანდეს ქვეყანა და აღარ იყოს აფხაზეთი ოკუპირებული",–აცხადებს ახალციხის მუნიციპალიტეტის მერი, ირაკლი ლაზარაშვილი.

აფხაზეთის ომის ვეტერანის, სამხედრო ექიმის, დავით ფეიქრიშვილის თქმით, ქვეყნის ოკუპაცია კვლავ გრძელდება.

"მცოცავი ოკუპაცია გრძელდება. ჩემი დედულეთიც ლიახვის ხეობაშია და ჩათვალეთ, რომ გულის ნაწილს გვაცლიან ყოველდღიურად. ეს ტკივილი და იმედი 31 წელია მოგვყვება, რომ დავიბრუნებთ ჩვენს ტერიტორიებს. აფხაზეთი, როგორც საქართველოს ნებისმიერი კუთხე, ჩვენის აერთო სამშობლოს სხეულის ნაწილია. უფლის ნებით და ხალხის მონდომებით, აუცილებლად დავიბრუნებთ ამ ტერიტორიას, ეს გარდაუვალია",–ამბობს ის.

აფხაზეთის ომი 1992 წლის 14 აგვისტოს დაიწყო. 1992–1993 წლებში ომში სამცხე–ჯავახეთიდან 800–ზე მეტი ადამიანი წავიდა. 16 მებრძოლი დაიღუპა, მათ შორის: 4 ადიგენის, 8 ახალციხის, 2–2 კი ასპინძის და ბორჯომის მუნიციპალიტეტებიდან იყო. აფხაზეთის ომში რეგიონიდან 14 ჯარისკაცი დაიჭრა.