სიკეთე ყოველთვის დაგვიბრუნდება - ირმა გიორგაძე 3 შვილითა და 4 შვილობილით

საზოგადოება

30.03.2025

ირმა გიორგაძეს არასდროს უფიქრია, რომ საკუთარი სამი შვილის გარდა, კიდევ ოთხი ბავშვის დედობას იტვირთავდა, თუმცა, ცხოვრება მოულოდნელობებითაა სავსე. 2011 წელს, როცა ასპინძის ბავშვთა სახლი გაუქმდა, ირმამ სამუშაო დაკარგა და ოჯახს ფინანსური სირთულეები შეექმნა; სწორედ ამ პერიოდში გადაწყვიტა ირმამ მინდობილი მშობელი გამხდარიყო.

სოციალური სააგენტო თითო ბავშვის უზრუნველსაყოფად დღეში 35 ლარს იხდიდა, მაგრამ მხოლოდ შემოსავლის პერსპექტივა არ ყოფილა ირმასთვის მთავარი - როგორც პედაგოგმა, რომელსაც შეზღუდული შესაძლებლობის მქონე ბავშვებთან მუშაობის გამოცდილება ჰქონდა, ირმამ იცოდა, რომ ბავშვებისთვის არა მხოლოდ თავშესაფარი, არამედ პირველ რიგში სიყვარული და სითბო იყო მნიშვნელოვანი.

2011 წელს ქალთა კავშირ „რეას“ უკვე დაწყებული ჰქონდა ასპინძაში საქმიანობა, რაც საინტეგრაციო ცენტრის დაარსებასა და მისთვის პედაგოგების მომზადებას გულისხმობდა. ირმა გიორგაძემ „რეას“ ყველა სემინარი და სახელობო ტრენინგი გაიარა. სულ მალე, ირმა ამ ცენტრის წარმატებული პადაგოგი გახდა. ასე დაიწყო გზა, რომელმაც ირმას ცხოვრება შეცვალა.

პირველები იყვნენ 11 წლის ნინო და 8 წლის ანა – სენაკის ბავშვთა სახლიდან ჩამოყვანილი ორი გოგონა, რომლებმაც ირმას ოჯახში ახალი ცხოვრება დაიწყეს.

ოჯახისთვის ადვილი არ ყოფილა შშმ ბავშვების მინდობით აღზრდა. განსაკუთრებით რთული აღმოჩნდა ღრმა გონებრივი ჩამორჩენის მქონე მაიას მოვლა-პატრონობა, რომელიც მოგვიანებით შეუერთდა ოჯახს. „მაია საჭმელს პატარა ტომრებში მალავდა, ტანსაცმელს იხევდა...“ – იხსენებს ირმა. მაგრამ მოთმინება და სიყვარული ძლიერი ძალაა – ნელ-ნელა მაიამ ისწავლა, როგორ უნდა ეცხოვრა ოჯახში. დღეს ის 23 წლისაა და კვლავ ირმას გვერდითაა.

ანა, ირმასთან ცხოვრების სამი წლისთავზე საკუთარ ძმებთან, დუშეთში გადაიყვანეს, ნინო კი 21 წლის ასაკში - წყალტუბოს სათემო ცენტრში. ირმას მასთან კავშირი არ გაუწყვეტია – ხშირად ჩადის მის სანახავად, რათა დარწმუნდეს, რომ შვილობილი ბედნიერია.

2022 წელს ირმამ ჩვილი სალომე შემოიყვანა ოჯახში. მისი დედა თავად იყო შშმ პირი და ბავშვზე ზრუნვა არ შეეძლო. ახლა სალომე 2 წლისაა. ირმასა და მისი ოჯახის დახმარებით, ნელ-ნელა განვითარების ეტაპების ჩამორჩენას წარმატებით სძლევს, საბავშვო ბაღში დადის, თანატოლებთან თამაშს სწავლობს და სამყაროს ნდობით უყურებს.

ირმას ცხოვრება მარტივი არ ყოფილა, მაგრამ მინდობილი ბავშვების მიმართ სიყვარული და მზრუნველობა მის ოჯახს ამყარებს. „ყველას თავისი გზა აქვს; მჯერა, რომ სიკეთე ყოველთვის დაგვიბრუნდება,“ – ამბობს ის ღიმილით და სახლში პატარა სალომეს თბილად იკრავს გულში.

ირმა გიორგაძე „გადავლახოთ ბარიერების" პროექტის მონაწილეა.

წყარო: კავშირი რეა