ახალციხის მეშვიდე სკოლა–პანსიონის ყოფილ შენობაში უკანონოდ შესახლებულმა ვეტერანებმა, რაიონული სასამართლოს გადაწყვეტილება მომდევნო ინსტანციაში გაასაჩივრეს. მიიღებს თუ არა საქმეს წარმოებაში თბილისის სააპელაციო სასამართლო უცნობია.

მართლმსაჯულების ორგანოს მეორე ინსტანციას ვეტერანებმა 19 მაისს მიმართეს. საქმის განხილვის დაწყების შემთხვევაში მათ ინტერესებს ივანე ტატალაშვილის ნაცვლად ადვოკატი დავით თელიაშვილი დაიცავს. თბილისის სააპელაციო სასამართლოში საჩივრის შესატაად ხუთი ვეტერანი გაერთიანდა.

ახალციხის რაიონულმა სასამართლომ ე.წ. "ვეტერანების საქმეზე" გადაწყვეტილება 19 აპრილს მიიღო, რომლის თანახმადაც პეტრე იბერის 17 ნომერში მდებარე შენობაში შეჭრილებმა ფართი უნდა დაცალონ და ბაჟი – თითოეულმა მათგანმა 120 ლარის ოდენობით გადაიხადოს. ბაჟის გადახდასა და ალტერნატიული ფართის მიღების გარეშე გამოსახლებაზე ვეტერანთა ოჯახები უარს აცხადებენ.

სკოლა–პანსიონის ყოფილი შენობა სოციალურად დაუცველთა და ვეტერანთა ათმა ოჯახმა 2016 წლის სექტემბერში უკანონოდ დაიკავა. ამ დროისათვის აქ ოთხი ოჯახი ცხოვრობს. შენობის მესაკუთრე ქალაქის მერიაა, რომელმაც ობიექტი "სამცხე–ჯავახეთის რეგიონული განვითარების სააგენტოს" უზურფრუქტის წესით 2014 წლის 4 ივნისს გადასცა. სააგენტოს შენობაში საგანმანათლებლო ცენტრის გახსნა აქვს დაგეგმილი.

ვეტერანების გამოსახლების მოთხოვნით, ახალციხის მერიამ რაიონულ სასამართლოს 1 თებერვალს მიმართა.