ცესკოს თავმჯდომარეს საღებავი შეასხეს, არჩევნების შემაჯამებელი სხდომა შეწყდა

არჩევნები

16.11.2024

ხმაურით დაიწყო ცენტრალური საარჩევნო კომისიის სხდომა, რომელზეც 26 ოქტომბრის არჩევნების შედეგების შეჯამება დაიგეგმა. კომისიის წევრმა "ერთიანი ნაციონალური მოძრაობიდან", დავით კირთაძემ ცენტრალური საარჩევნო კომისიის თავმჯდომარეს შავი სითხე შეასხა, რის შემდეგაც სხდომა მცირე ხნით შეწყდა.

“სამწუხაროდ, იმ გამოწვევას ვერ უპასუხა ცენტრალურმა საარჩევნო კომისიამ, თქვენი ხელმძღვანელობით, რომელსაც ასე დამსახურებულად ევროპისკენ უნდა წავეყვანეთ და დღეს, თქვენი ხელმძღვანელობით, თქვენი უშუალო ჩართულობით, თქვენი უსამართლო გადაწყვეტილებებით, ქვეყანა რუსეთისკენ მიექანება”, - მიმართა დავით კირთაძემ ცესკოს თავმჯდომარეს, გიორგი კალანდარიშვილს და მას “ყველაზე ცუდი თავმჯდომარე” უწოდა.

კალანდარიშვილმა კირთაძეს სიტყვის დასრულების საშუალება არ მისცა. სიტყვიერი შელაპარაკების შემდეგ, კირთაძემ კალანდარიშვილს შავი სითხე შეასხა. კირთაძე დარბაზიდან დაცვამ გაიყვანა. ცენტრალური საარჩევნო კომისიიდან პირდაპირი ეთერი შეწყდა.

ინციდენტის შემდეგ, დაახოებით წუთში სხდომა კვლავ განახლდა. ცესკოს თავმჯდომარემ, რომელსაც ერთი თვალი ახვეული აქვს, განაცხადა, რომ მოწინააღმდეგეები ბულინგით ვერაფერს მიაღწევენ და, რომ “არჩევნებთან დაკავშირებით არ არსებობს რაიმე ხელშესახები გარემოება, რომელიც მიუთითებდა იმაზე, რომ არჩევნები იყო მანიპულირებული”.

ცესკოს სხდომის პარალელურად, საპროტესტო აქცია მიმდინარეობს. შეკრებილები მოითხოვენ, რომ არ მოხდეს 26 ოქტომბრის არჩევნების შეჯამება, რადგან არჩევნებს ისინი გაყალბებულად თვლიან.