ახალციხეში სატყეო სამსახურის თანამშრომლები საჯაროდ აიცრნენ
15:28 / 10.08.2021
ახალციხის რეფერალურ ჰოსპიტალში, სამცხე-ჯავახეთის სატყეო სამსახურის თანამშრომლები COVID19-ის საწინააღმდეგო ვაქცინით საჯაროდ აიცრნენ. კლინიკაში იმუნიზაცია სატყეო სამსახურის 22-მა თანამშრომელმა, „სინოფარმით“ და „ფაიზერით“ ჩაიტარეს.
საჯაროდ აცრის მიზანი ვაქცინაციის პოპულარიზაცია და იმუნიზაციის მსურველთა რაოდენობის გაზრდა იყო.
აცრის პროცესს აკვირდებოდა სამცხე-ჯავახეთის სახელმწიფო რწმუნებული ბესიკ ამირანაშვილი.
„საჯარო სამსახურში დასაქმებულმა ადამიანებმა მაგალითი უნდა მისცენ ჩვენს მოქალაქეებს, რომ გაუფრთხილდნენ ერთმანეთს და აუცილებლად მიიღონ იმუნიზაციის პროცესში მონაწილეობა“, - აღნიშნა ბესიკ ამირანაშვილმა.
მისი ინფორმაციით, ვაქცინაციის პროცესი ახლო მომავალში სოფლის ამბულატორიებში დაიწყება. ბესიკ ამირანაშვილი იმედოვნებს, რომ იმუნიზაციის კაბინეტების რაოდენობის გაზრდასთან ერთად, მოიმატებს რეგიონში ვაქცინირებულთა რაოდენობა.