პოლიტიკა
დღეს რომ საქართველოში მშვიდობაა, არც თუ უმნიშვნელი წვლილი მოსკოვში ჩემი და დავით თარხან-მოურავის ვიზიტმაც შეიტანა - ირმა ინაშვილი
თვეების წინ, როცა ჩვენ საჯაროდ ვსაუბრობდით ომში საქართველოს ჩათრევის საშიშროებაზე, “ქართული ოცნების” სპიკერთა ნაწილი გამყიდველებს გვეძახდა. ახლა თვითონ გვარწმუნებენ, რომ ეს საფრთხე რეალური იყო და ომი აგვაცილეს თავიდან! – ამის შესახებ “პატრიოტთა ალიანსის” ლიდერი ირმა ინაშვილი სოციალურ ქსელში წერს და აცხადებს, რომ საფრთხე კვლავ რეალურია და კარგი იქნება, თუ თვითდამშვიდებას არ მივეცემით.

,,საფრთხე კვლავ რეალურია და კარგი იქნება, თუ თვითდამშვიდებას არ მივეცემით! ომის დაწყებისას საჯაროდ ვამბობდით და ახლაც ვამბობთ: უზომოდ განვიცდით უკრაინელების ტრაგედიას და ამასთან, ვხედავთ, რომ უკრაინის ხელისუფლება საქართველოს მეგობარი კი არა, ნაცმოძრაობის მეგობარია და “ქართული ოცნების “დიადი” სპიკერები კვლავ გვარწმუნებდნენ, რომ ეს, თურმე, მცდარი თეორიაა. 

ნეიტრალიტეტისკენ სწრაფვა მოღალატეობააო, ესეც “ქართული ოცნების” პოლიტიკური ოპერიდანაა, მაგრამ დაიმახსოვრეთ: სულ მალე მოისმენთ, რომ ნეიტრალიტეტი, თურმე, “ქართული ოცნების” ბრძოლისა და შემოქმედების ნაყოფი ყოფილა.

პირველ რიგში, ნეიტრალიტეტის პერსპექტივებზე მგზნებარე კომენტარებს ის გია ვოლსკი გააკეთებს, რომელიც ჩვენს ვიზიტს მოსკოვში ანტისახელმწიფოებრივ ქმედებად აფასებდა და მჭმუნვარე სახით ნატოს უალტერნატივობას ამტკიცებდა. საოცარი თეზისი დაბადეს – აი, ნატოს ღია კარი მარადიულად ღია რომ იყოს და კარში არავინ შეგვიშვას, ესეც დიდი მიღწევააო.

ახლა პირველად ჩემს ცხოვრებაში, მინდა რაღაცა საკუთარ თავზეც ვთქვა: დღეს რომ საქართველოში მშვიდობაა, ამაში არც თუ უმნიშვნელი წვლილი მოსკოვში ჩვენმა- ჩემი და დავით თარხან-მოურავის ვიზიტმაც შეიტანა. ჩვენმა წერილებმა და მიმართვებმა შეიტანეს.

მოსკოვში იმ პერიოდში ვიყავით, როცა ავსტრიის კანცლერი რუსეთის პრეზიდენტს ხვდებოდა. იქაც მშვიდობაზე იყო ლაპარაკი, მძიმე ლაპარაკი… და ჩვენც (ჩვენი შეხვედრების ფორმატში) მშვიდობისთვის ვშრომობდით. ჩვენი ქვეყნისთვის ვშრომობდით! და ბოლოს, უკრაინაში უბედურება ტრიალებს!

მოღალატეობა ისაა, რაც კოდორსა და ახალგორში მოხდა - ქართული მიწები უომრად გაყიდეს! მშვიდობისათვის ბრძოლა არაა მოღალატეობა. მძიმე დროა. სიფრთხილე და გონიერება გვმართებს! არავის არ უნდა გამოვაყენებინოთ თავი და არ უნდა დავაშლევინოთ ქვეყანა”
– წერს ირმა ინაშვილი.

უკრაინაში რუსეთის სამხედრო ინტერვენციის ფონზე პოლიტიკური პარტიის “პატრიოტთა ალიანსის” წარმომადგენლებმა ორგანიზაცია “რუსეთის ჯავახკური დიასპორის” პრეზიდენტ აგასი არაბიანთან ერთად რუსეთში ვიზიტი გამართეს. ამის შესახებ ინფორმაცია რუსეთის ფედერალურმა საბჭომ გაავრცელა.

პრორუსმა აქტორებმა, მათ შორის, პატრიოტთა ალიანსმა, რუსეთის პრეზიდენტს ღია წერილით 2021 წლის 2 აგვისტოსაც მიმართეს. წერილის სულისკვეთება იდენტური იყო: გალაშქრება ნატოს წინააღმდეგ და რუსეთთან დიპლომატიური ურთიერთობების აღდგენისა და სოციალურ-კულტურული კავშირების გაღრმავების სურვილი.

ირმა ინაშვილი, ქვეყნის ნეიტრალიტეტის მომხრე რომაა, ეს პრორუსული პარტიის ლიდერს არაერთხელ უთქვამს. პოლიტიკოსებისა და საზოგადოების ნაწილის კრიტიკას მან სოციალურ ქსელში უპასუხა, სადაც წერს, რომ დროა საქართველო ოფიციალურ კრემლს მშვიდობაზე ესაუბროს. პატრიოტთა ალიანსი, მოსკოვში შეხვედრებს პერიოდულად მართავს.
Print