რელიგიური გრძნობების შეურაცხყოფა შესაძლოა დასჯადი გახდეს. ამ შემთხვევაში კანონდამრღვევი 300 ლარით დაჯარიმდება – ახალ კანონპროექტს სამცხე–ჯავახეთში მოსახლეობა და სხვადასხვა კონფესიის წარმომადგენლები აფასებენ.
“ყველა სოფელში ხომ გააკეთეს მეჩეთი, ახლა ხმა თუ არ ამოვიღეთ ახლა მინარეთსაც მიუდგამენ და რომ გადმოხედავ ზევიდან, იქნება მუსლიმური ქვეყანა და არა ქრისტიანული”, “არ უნდა დაიდგას არსად მეჩეთი, არც აქ და არც არსად. ვისაც არ უნდა ქრისტიანობა, გზა დიდია” – ეს განცხადებები, 2013 წელს, ჭელის მინარეთის მოჭრის შემდეგ, სამცხე–ჯავახეთში გაკეთდა. თუ ადმინისტრაციულ სამართალდარღვევათა კოდექსში ცვლილებები შევა და ,,რელიგიური გრძნობების შეურაცხყოფა“ დასჯადი გახდება, მსგავსი შინაარსის კომენტარის ავტორები, შესაძლოა, 300 ლარით დაჯარიმდნენ. კანონპროექტის ინიციატორები თვლიან, რომ ბოლო დროს, რელიგიებისა და სასულიერო პირების შეურაცხყოფის ფაქტები გახშირდა. სამცხე–ჯავახეთის რელიგიურად ჭრელი მოსახლეობის აზრი სხვადასხვაგვარია.
იყენებენ თუ არა მოქალაქეები სიტყვისა და გამოხატვის თავისუფლებას არასწორად და ლახავენ თუ არა ამით რელიგიურ გრძნობებს – სხვადასხვა კონფესიის წარმომადგენლების შეხედეულება და მოლოდინი სხვავდასხვაგვარია. თუმცა კათოლიკურ, მუსლიმურ და სომხურ სასულიერო პირებს, რამდენიმე მიზეზის გამო, ინიციატივის ეფექტურობაში ეჭვი ეპარებათ.
სამცხე–ჯავახეთის მუფთი ფიქრობს, რომ მოქალაქე, არა სასულიერო პირების შეურაცხყოფის, არამედ რელიგიური შენობისა და სიწმინდეების დაზიანების გამო უნდა დაისაჯოს. მამუკა ვაშაყმაძე, ამ მხრივ, კანონის გამკაცრებასაც მიესალმება და იმასაც აღნიშნავს, რომ მოქმედი კანონმდებლობა, მორწმუნე ადამიანის დარღვეული უფლებების დაცვას ითვალისწინებს, თუმცა მათი რელიგიური გრძნობები მაინც ილახება. ამიტომ, აღნიშნული ინიციატივა, ჭელის მოვლენების დროს, კანონის სახით რომ არსებულიყო, სიტუაციას მაინც არ შეცვლიდა.
საზოგადოებამ შეურაცხყოფისგან თავი არა კანონის შიშით, არამედ ერთმანეთისადმი პატივისცემის გამო უნდა შეიკავოს – ამბობს კათოლიკური ეკლესიის წარმომადგენელი, მესხეთის დეკანოზი. ზურა კაკჩიშვილი ფიქრობს, რომ კანონპროექტები, რომლებიც რელიგიურ გრძნობებს ეხება, სხვადასხვა კონფესიის წარმომადგენლებთან ერთად უნდა დამუშავდეს.
ადმინისტრაციულ სამართალდარღვევათა კოდექსში, აღნიშნული ცვლილებების შეტანის დიდ აუცილებლობას ვერ ხედავს სომხური სამოციქულო ეკლესიის წარმომადგენელი. ბერი აკოფ სააკიანი ამბობს, რომ დღემდე, რელიგიური გრძნობების შეურაცხყოფის საგანგაშო ფაქტები, სამცხე–ჯავახეთში არ მომხდარა. შედარებით უმნიშვნელო შემთხვევებს, მხარეები კონფლიქტის გარეშე აგვარებენ. სასულიერო პირს, კანონის ეფექტურობაში, ეჭვი ეპარება.
სასულიერო პირები ტერმინის – ,,რელიგიური გრძნობების შეურაცხყოფის“ განმარტებას ითხოვენ. ყველა კონფესიის წარმომადგენელი ფიქრობს, რომ კანონპროექტი ბუნდოვანია და მისი ინტერპრეტაცია, ან სხვადასხვა სიტუაციაზე მორგება მარტივი იქნება. ეს კი, საზოგადოებაში, უკმაყოფილებას გამოიწვევს. კანონმა უნდა დაიცვას ადამიანის უფლება, ის არ უნდა აღიზიანებდეს მოქალაქეს – ფიქრობენ სასულიერო პირები.
