EMC-ის სამოქალაქო და პოლიტიკური უფლებების პროგრამის დირექტორი, მოხი სადავო შენობასთან დაკავშირებით შექმნილი სპეციალური კომისიის გადაწყვეტილებაზე, განცხადებას ავრცელებს. თამთა მიქელაძის აზრით, კომისიის გადაწყვეტილება პრობლემურია. 

თამთა მიქელაძის განცხადებას “მეცხრე არხი” უცვლელად გთავაზობთ:

„მოხის კომისიის გადაწყვეტილება პრობლემურია რამდენიმე არგუმენტის გამო:

ისტორიული შენობის ისტორიულ-კონფესიურ წარმომავლობის შესწავლაზე და ისტორიული მესაკუთრისთვის მის დაბრუნებაზე უარი არ შეიძლება იყოს გამართლებული ლეგიტიმური საჯარო ინტერესით. ისტორიული შენობის ნაცვლად ალეტრნატიული ქონების შეთავაზება იმ შემთხვევაში შეიძლება მოხდეს, როდესაც მისი ფაქტობრივი დაბრუნება შეუძლებელია მისი განადგურების ან კონკრეტული შენობის მაღალი საჯრო ინტერესის მქონე ობიექტად გამოყენების გამო. ამ შემთხვევაში დომინანტი ეკლესიის და დომინანტი ჯგუფის დაუსაბუთებელი პრეტენზია და მათ მიერ დაწყებული კონფლიქტი, რომელიც მხარდაჭერილი იყო ადგილობრივი ხელისუფლების მიერ არ შეიძლება გახდეს ისტორიული შენობის დაბრუნებაზე უარის თქმის ლეგიტიმური მიზეზი.

აღნიშნული პრობლემის მიზეზი არსებითად არადომინანტი რელიგიური ჯგუფების მიმართ რესტიტუციის სახელმწიფო პოლიტიკის არ არსებობაა. სახელმწიფომ რელიგიური ნაგებობების ძირითადი ნაწილი დაუბრუნა მართლმადიდებელ ეკლესიას, თუმცა იგივე არ გაუკეთებია სხვა რელიგიების მიმართ, რის გამო ეს პოლიტიკა ცალსახად დისკრიმინაციულია. მოხის კომისიამ არც კი იმსჯელა შენობის მესაკუთრის დადგენის და მისი დაბრუნების საკითხებზე, რითაც რესტიტუციის შესაძლებლობა იმთავითვე გამორიცხა;

კომისიის გადაწყვეტილება სავალდებულო არ არის, ის სახელმწიფო გადაწყვეტილებაც არ არის, ამიტომ ადგილობრივ მუსლიმ თემს შეუძლია საკუთარი დავის გაგრძელება. აქ ჩვენ შეგვიძლია ვილაპარაკოთ არა რელიგიის თავისუფლების შეზღუდვაზე, არამედ რესტიტუციის პოლიტიკის არ არსებობის გამო, ადამიანის უფლებების სტანდარტებიდან გამომდინარე, საკუთრების უფლების შეზღუდვაზე;

 სამუფტო სამმართველოს მიერ ამ გადაწყვეტილებაზე დათანხმება მუსლიმ თემსა და სამმართველოს შორის გაუცხოების და დაპირისპირების კიდევ ერთი ცხადი მაგალითია და სწორედ რელიგიის საკითხთა სახელმწიფო სააგენტო აწარმოებს სამუფტო სამმართველოს კონტროლის ამ პოლიტიკას და მუსლიმ თემს წარმომადგენლების გარეშე ტოვებს. აღსანიშნავია, რომ კომისიამ მის შემადგენლობაში არ შეიყვანა სხვა პირები, რომელსაც ადგილობრივი მუსლიმი თემი მოითხოვდა და ის მხოლოდ სამუფტო სამმართველოს წარმომადგენლებით დააკომპლექტა” – ნათქვამია განცხადებაში.

EMC კომისიის გადაწყვეტილებასთან დაკავშირებით განცხადებას მოგვიანებით გაავრცელებს.