ქრისტე აღსდგა! ჭეშმარიტად აღსდგა! – დღეიდან მაცხოვრის ამაღლებამდე  კათოლიკე და სომხური სამოციქულო ეკლესიის მრევლი ასე ესალმება და ერთმანეთს უფლის აღდგომას აუწყებს.

ვნების კვირის შემდეგ მორწმუნეები აღდგომის ბრწყინვალე დღესასწაულს ზეიმობენ. ახალციხის წმინდა გრიგოლ განმანათლებლის სახელობის სომხურ სამოციქულო ეკლესიაში სადღესასწაულო ლიტურგიის შესრულება 4 აპრილს 17:00 საათზე დაიწყო. ტაძრის წინამძღვარმა მრევლს მაცხოვრის აღდგომა ახარა. წირვის ბოლოს მამა ღევონთმა სანთლები აანთო და ცეცხლი მრევლს გაუნაწილა.  მორწმუნეებმა ანთებული სანთლები სახლებში წაიღეს. მათ სჯერათ,  რომ  ცეცხლთან ერთად ოჯახებში სინათლე და სიკეთე შეიტანეს.

ახალციხის  ღვთისმშობლის სავარდის სახელობის კათოლიკურ ტაძარში სადღესასწაულო მესა და ღამისთევის ღვთისმსახურება 4 აპრილს 21:00 საათზე დაიწყო. აქ წმინდა კელაპტარი წირვის დაწყებისთანავე აინთო.  რამდენიმე საათიანი ლუტურგიის შემდეგ    მორწმუნე კათოლიკეებმა ერთმანეთს  უფლის აღდგომა ახარეს.  მამ ტომაშ ვრონსკის განმარტებით, ეს არის ღამე, როდესაც სიკვდილზე სიცოცხლე იმარჯვებს.

უფლის ბრწყინვალე აღდგომის დღესასწაულს წინ 40 დღიანი მარხვა უძღოდა. დღეს კი მორწმუნეები ერთმანეთს ტრადიციულად წითელი კვერცხებით ულოცავენ ამ წმინდა დღეს. გადმოცემის თანახმად, აღდგომას მარიამ მაგდალინელი რომში შევიდა და სახარება იქადაგა. მას თან პირველი სააღდგომო კვერცხი ჰქონდა. მარიამმა ქადაგებისას წარმოსთქვა “ქრისტე აღსდგა“ და კვერცხი წითლად შეიღება.