ახალციხის ციხეზე 26 მაისისადმი მიძღვნილი ღონისძიებები მიმდინარეობს
13:45 / 26.05.2023
ახალციხის ციხეზე 26 მაისისადმი მიძღვნილი ღონისძიებები მიმდინარეობს. დღეს, დღის განმავლობაში, ახალციხის ციხის ტერიტორიაზე მოეწყობა გამოფენები, კონკურსები, საბავშვო სპექტაკლები და შოუები, მუსიკალური და თეატრალური წარმოდგენები, სპორტული აქტივობები.
საღამოს კი დასკვნითი კონცერტი გაიმართება. ახალციხელებისთვის ანსამბლი „გორდელა“, ოთო ნემსაძე და ბენდი იმღერებენ.
საქართველოს დამოუკიდებლობის დღე არის საქართველოს ეროვნული დღესასწაული, რომელიც აღინიშნება ყოველი წლის 26 მაისს, ნიშნად საქართველოს სახელმწიფოებრივი დამოუკიდებლობის გამოცხადებისა.
მიუხედავად იმისა, რომ სსრკ-ისგან დამოუკიდებლობა 1991 წლის 9 აპრილს გამოცხადდა, ეროვნულ დღესასწაულად მაინც 1918 წლის 26 მაისს გამოცხადებული დამოუკიდებლობის დღე აღინიშნება.
საქართველოს დემოკრატიული რესპუბლიკა იყო პირველი რესპუბლიკა საქართველოს ტერიტორიაზე. იგი შეიქმნა 1918 წლის 26 მაისს რუსეთის იმპერიის დაშლისა და 1917 წლის რევოლუციის შემდეგ.