ბორჯომში, 16 მარტს, დანიშნული რიგგარეშე სხდომა მეექვსედ გადაიდო. საკრებულო მერიისგან ისევ ხელფასის ოდენობის კორექტირებას ითხოვს.

ოპოზიციონერი დეპუტატები განმარტავენ, რომ მერია კანონს არღვევს, როცა ხელფასებს ძველი საშტატო ნუსხით არ გასცემს. ლეიბორისტი დეპუტატი ,,ქართულ ოცნებას“ კოლეგებზე ზეწოლასა და კრიზისის ხელოვნურად შექმნაში სდებს ბრალს. გიორგი გიუაშვილი ლიპარტიას შეთავაზებას, მერის მიერ ჩამოწოდებულ სატყუარას უწოდებს, სადაც მხოლოდ თავად იკლებს თანხასა და მოადგილესა და სამსახურის უფროსებს მაქსიმალურად უმატებს.

,,სრული უკანონობა და დანაშაული ხდება მერის მხრიდან, როცა მას არ გამოაქვს ძველი საშტატო ნუსხით ხელფასები. კრიზისი ხელოვნურად არის გამოწვეული, რომ მოხდეს ძალადობრივი ქმედებები, რათა საკრებულოს დაუპირისპირდნენ ადამიანები ხელფასის მიზეზით.

ძველი საშტატო არავის გაუუქმებია, ახალი არ არის მიღებული. ეს არის საკრებულოს ძალადობრივი გზით დამხობის მცდელობა. ბრმა იარაღად არიან რიგითი მოხელეები გამოყენებული. ეს არის ჩვეულებრივი პარტიული აქტივის ომი ჩვენ წინააღმდეგ.

ერთი თვეა უკვე ძალიან დიდი ზეწოლებია ჩვენ წინააღმდეგ. ყველას გმირობას ვერ აიძულებ, თუმცა ჩვენ უკვე გამარჯვებულები ვართ, რადგან ამ ბრძოლაში სპეცრაზმის შემოყვანა დაჭირდათ 15 დეპუტატის წინააღმდეგ" – აცხადებს გიორგი გიუაშვილი.

ზაზა ჩაჩანიძის მტკიცებით, მერია არ ეთანხმება ზღვრულ ფარგლებში ხელფასების მატებას და ანაზღაურების მაქსიმალურად გაზრდას ითხოვს. საკრებულოს თავმჯდომარე ირწმუნება, რომ რიგით თანამშრომლებზე ხელფასების მატების პრობლემა მათ არასდროს ჰქონიათ.

ზაზა ჩაჩანიძე იმასაც განმარტავს, რომ მუნიციპალიტეტის მერს ლევან ლიპარტიას თანამშრომლობას და დიალოგს სამუშაოს პირველივე დღიდან სთავაზობს, თუმცა მისთვის გაურკვეველი მიზეზების გამო ამის სურვილი ქართული ოცნებისგან ამ დრომდე ვერ დაინახა.

,,რიგით თანამშრომლებზე არასდროს ყოფილა პრობლემა და ვეთანხმებით ანაზღაურების მატებას რანგირებით, ზოგს ემატება 100 ლარი, ზოგს – 200, ზოგს – 150 ლარი. სამსახურის უფროსებს, რომლებსაც აქვთ 1550 ლარი, ვთავაზობთ მოიმატონ ერთი ბიჯით–რანგირებით 150 ლარი და გაუხდებათ 1700 ლარი, მაგრამ ესენი გვეუბნებიან, რომ უნდა გვქონდეს 2000–იო.

ჩვენ ვეუბნებით, რომ ზომიერად მოიმატონ და ეგ თანხა საკმაოდ დიდი გამოდის ერთ წელიწადში და მითუმეტეს ოთხში. კარგი გამოსავალი არის კომუნიკაცია, ერთად დაჯდომა და დიალოგი. ბორჯომის მერი, მუშაობის დაწყების დღიდან არ მოდის დიალოგზე. მე არ ვიცი ვინ აძლევს მას ასეთ განკარგულებებს.

ოპოზიციის დეპუტატების 4–5 კაცზე მიმდინარეობს ზეწოლა, თუმცა ჯერ არ ვასაჯაროვებთ მათი თხოვნით, ვისზეც მიმდინარეობს ზეწოლა", – აცხადებს ბორჯომის მუნიციპალიტეტის საკრებულოს თავმჯდომარე.

ოპოზიციონერი დეპუტატების ბრალდებებს მერის ნაცვლად საკრებულოს წევრი ქართული ოცნებიდან გიორგი ფერაძე პასუხობს. კოლეგებზე ზეწოლას კატეგორიულად გამორიცხავს და აცხადებს, რომ ქართული ოცნება ისევ რჩება ბოიკოტის რეჟიმში, თუმცა მერიის თანამშრომლები მოქალაქეების მომსახურებას კვლავ განაგრძობენ.

ამბობს, რომ მერი არ იმატებს ხელფასს, თუმცა კანონმდებლობის შესაბამისად, მოადგილეებს და სამსახურის უფროსებს ანაზღაურება ახალი საშტატო ნუსხით უნდა დაუმტკიცდეს. რადიო თავისუფლებისთვის მიცემულ ინტერვიუში გიორგი ფერაძე აცხადებს, რომ ქართული ოცნების დეპუტატები ყველა სამართლებრივი გზით იბრძოლებენ მერიის მიერ შეთავაზებული საშტატო ნუსხის დასამტკიცებლად.

,,ყველა სამართლებრივი მეთოდით ვიბრძოლებთ, რომ ეს საკითხი იქნას მორიგ სხდომაზე დაყენებული და გადაწყვეტილი თანამშრომლების და სახელმწიფოს ინტერესების მიხედვით. ნამდვილად არ არის მერის მხრიდან უფლებამოსილების გადამეტება ან კანონის უგულებელყოფა.

თუ ოპოზიცია საუბარს ზეწოლას არქმევენ, ეს მათი ნებაა. სრული პასუხისმგებლობით ვამბობ, რომ ზეწოლას ,,ქართული ოცნების" მხრიდან არ აქვს. დიალოგის მომხრეები ჩვენ ნამდვილად ვართ, ვიყავით ამისთვის მზად, მაგრამ ზაზა ჩაჩანიძე მხოლოდ და მხოლოდ საკუთარი ინტერესების მიხედვით წარმართავდა ნებისმიერი სახის დიალოგს და არა საზოგადოების ინტერესებიდან გამომდინარე. შესაბამისად, ჩვენ არ ვაპირებთ ზაზა ჩაჩანიძესთან დიალოგს.

ვინაიდან, გიუაშვილი არის გასული მომსახურების ზონიდან და მხოლოდ ერთი რამ აქვს ჩახვეული, ბუნებრივია ვერ ვისაუბრებთ მასთან ამ საკითხზე, მაგრამ არიან ადამიანები, რომლებიც შეგნებულად აზროვნებენ და მათთან საუბრის პრობლემა ნამდვილად არ გვაქვს" – განმარტავს გიორგი ფერაძე.

ახალ საშტატო ნუსხასა და ხელფასების მომატების საკითხის გამო საკრებულოს სხდომა მეექვსედ გადაიდო. 13 მარტს, ბორჯომში გამართულ ბრიფინგზე ლევან ლიპარტიამ საკრებულოს ოპოზიციონერ დეპუტატებს გონივრული ნაბიჯის გადადგმისკენ მოუწოდა. მერიის თანამშრომლები უკვე მესამე თვეა კუთვნილ ანაზღაურებას ვერ იღებენ.