ბორჯომში საკრებულოს თავმჯდომარის თანამდებობიდან გადაყენების მოთხოვნას უარყოფითად აფასებენ სამოქალაქო სექტორში. საიას

იურისტი მომხდარს ორი მიმართულებით განიხილავს – სამართლებრივითა და პოლიტიკურით. ქეთევან ბებიაშვილი აცხადებს, რომ შიდა დაპირისპირებიდან გამომდინარე შექმნილი პრობლემები, რიგით თანამშრომლებზეც აისახა.

,,ბორჯომის საკრებულო უნიკალურია თავისი მრავალპარტიულობით. იგი განსაკუთრებული გამოწვევის წინაშე საკრებულოში განცხადების შეტანის შემდეგ დადგა. დეპუტატებმა უნდა გადაწყვიტონ ვინ უნდათ თავმჯდომარედ. მათ უნდა მიიღონ ობიექტური და არა პოლიტიკური გადაწყვეტილება.

თუ გაჩნდა კითხვები იმ ორ წევრზე, რომლებიც ზაზა ჩაჩანიძის თანაპარტიელები არიან, მაგრამ მისი გადადგომის შესახებ განცხადებას ხელი მაინც მოაწერეს, თუ არსებობს მუქარის ალბათობა, ეს საკმარისია იმისათვის, რომ დაიწყოს გამოძიება, ხომ არ მოხდა რაიმე სახის ზეწოლა მათზე, რის გამოც მიიღეს დეპუტატებმა ასეთი გადაწყვეტილება".

საკრებულოს თავმჯდომარის იმპიჩმენტის მოთხოვნას უარყოფითად აფასებენ არასამთავრობო ორგანიზაცია „დემოკრატ მესხთა კავშირში“. ორგანიზაციის ხელმძღვანელი განმარტავს, რომ ქვეყანაში ერთადერთ მრავალპარტიულ თვითმმართველობას ამ გადაწყვეტილებით, შესაძლოა, საფრთხე დაემუქროს.

საკრებულოს აპარატში ზაზა ჩაჩანიძის იმპიჩმენტის მოთხოვნით შესულ განცხადებას „ქართული ოცნების“ დეპუტატებთან ერთად „პატრიოტთა ალიანსის“ ორი წევრიც აწერს ხელს. გიორგი ანდღულაძე ფიქრობს, რომ ზაზა ჩაჩანიძის თანაპარტიელები ხელის მოწერაზე სასურველი შეთავაზებით ან მუქარით დაითანხმეს.

,,საერთო ჯამში ძალიან ცუდია, რადგან ერთადერთი მრავალპარტიული თვითმმართველობა, რომელიც გვყავს ბორჯომში, ვერ ახერხებს მერიასთან თანამშრომლობას. გამოდის, რომ მრავალპარტიული დემოკრატიის არსებობასაც კი ვეწინააღმდეგებით და ეს ერთადერთი მსგავსი მაგალითის მქონე თვითმმართველობაც არ გვინდა, რომ შევინარჩუნოთ.

რაც შეეხება ,,პატრიოტთა ალიანსი–ს გადაწყვეტილებას, რომ მხარს უჭერენ მმართველ პარტიას და გამოდიან თანაპარტიელის წინააღმდეგ, ორ ფაქტორთან გვაქვს საქმე – ან მოხდა ამ ადამიანების გადაბირება სასურველი შეთავაზების ხარჯზე, ან განხორციელდა ზეწოლა. სამწუხაროდ, თუ მოხდა იმპიჩმენტი, ესეც იქნება ჩვეულებრივი ერთპარტიული საკრებულო საქართველოს დანარჩენი საკრებულოების მსგავსად".

სამოქალაქო სექტორი მიიჩნევს, რომ ბორჯომიც იმ საკრებულოების რიცხვს დაემატება, რომლებიც მერიასთან შეთანხმებით იღებენ გადაწყვეტილებას. ბორჯომის საკრებულო ერთადერთია, სადაც წევრთა უმრავლესობას ოპოზიცია წარმოადგენს.

საკრებულოში მმართველი გუნდიდან 13 დეპუტატია, ოპოზიციიდან კი - 15. სამცხე–ჯავახეთში ყველაზე მრავალპარტიული ბორჯომის საკრებულოა.