Իշխանությունը ոստիկանության միջոցով ահաբեկչության նոր մեթոդներ է կիրառում բողոքի ցույցերի մասնակիցների և ակտիվ քաղաքացիների նկատմամբ: Քաղաքացիների ապօրինի ձերբակալությունը, հարցաքննության նպատակով հարկադրաբար տեղափոխումը և փաստաբանների ներկայացուցիչ լինելու իրավունքի սահմանափակումը կոպտորեն խախտում են Վրաստանի Սահմանադրությունն ու օրենսդրությունը և պետք է անհապաղ դադարեցվեն,- ասվում է հասարակական կազմակերպությունների համատեղ հայտարարության մեջ։

Ինչպես կազմակերպությունները նշում են, քաղաքացիները անընդհատ տեղեկացնում են թեժ գծով, որ «ոստիկանությունն ոտնահարում է օրենսդրությունն ու քաղաքացիների իրավունքները»:

«Վերջին օրերին իշխանությունը ցույցերի մասնակիցների նկատմամբ կիրառել է ոստիկանության ահաբեկչության նոր մեթոդներ։ Հասարակական կազմակերպությունների թեժ գծին մշտապես տեղեկություններ են փոխանցվում այն մասին, որ ոստիկանությունը խախտում է օրենսդրությունը և քաղաքացիների իրավունքները։

Մասնավորապես, ոստիկանները այցելում են ցույցերի մասնակից քաղաքացիների տներ և հայտարարում, թե իբր ծանուցագիր պետք է փոխանցեն, պահանջում են մուտք գործել բնակարան, ապա քաղաքացիներին, նրանց կամքին հակառակ և առանց հիմնավորման, հարկադրաբար տեղափոխում են ՆԳՆ Կենտրոնական քրեական ոստիկանության դեպարտամենտ։ Հարցաքննությունները նույնպես տեղի են ունենում հարկադրաբար։ Փաստաբաններին թույլ չեն տալիս հանդիպել քաղաքացիների հետ և ապահովել նրանց ներկայացուցչությունը։ Վերջին օրերին փաստաբանները փորձել են մուտք գործել հարկադրաբար տեղափոխված անձանց մոտ, սակայն ապարդյուն։

Քրեական դատավարության օրենսգիրքը հստակ սահմանում է, որ հարցաքննություն իրականացնող կողմը պարտավոր է անձին նախապես պարզաբանել, որ հարցաքննությունը կամավոր է և որ նա իրավունք ունի օգտվել փաստաբանի ծառայություններից։ Վկայություն տալու պարտավորությունը գործում է միայն մագիստրատ դատավորի կանչով, ինչը ոստիկանության այս գործողությունները դարձնում է անօրինական։

Հետևաբար, քաղաքացիների ապօրինի ձերբակալությունը, հարկադրաբար հարցաքննության տեղափոխումը, հարկադրական հարցաքննությունները և փաստաբանների ներկայացուցչական իրավունքի սահմանափակումը կոպտորեն խախտում են Վրաստանի Սահմանադրությունն ու օրենսդրությունը և պետք է անհապաղ դադարեցվեն», - ասվում է հայտարարության մեջ։

Հայտարարությունը ստորագրել են հետևյալ կազմակերպությունները՝

«Վրաստանի երիտասարդ իրավաբանների ասոցիացիա»
«Քաղաքացիական հասարակության հիմնադրամ»
«Միջազգային թափանցիկություն - Վրաստան»
«Կանանց նախաձեռնությունների աջակցության խումբ»
«Իրավունքներ Վրաստան»
«Դեմոկրատիայի հետազոտությունների ինստիտուտ»
«Վրաստանի դեմոկրատական նախաձեռնություն»
«Իրավապաշտպանների միավորում - Մարդու իրավունքների կենտրոն»
«Արդար ընտրությունների և ժողովրդավարության միջազգային հասարակություն»
«Գործընկերություն մարդու իրավունքների համար»
«Սոցիալական արդարության կենտրոն»։