Ադիգենի մունիցիպալիտետի խորհրդի աշխատակազմի ղեկավար Միխեիլ Բուցխրիկիձեն այսօր, դեկտեմբերի 26-ին, սոցիալական ցանցերում անդրադարձել է Վրաստանում ընթացող իրադարձություններին՝ դատապարտելով բռնությունը և ընդդիմանալով Վրաստանի կառավարության որոշմանը՝ դադարեցնել բանակցությունները Եվրամիության հետ:

«Եվրոպան մեր երկրի պատմական ճանապարհն է: Միևնույն ժամանակ, մեր երկրի զարգացման և անվտանգության համար դա միակ կարևոր ուղին է»,- նշել է Բուցխրիկիձեն tv9news.ge-ին տված հարցազրույցում։

Միխեիլ Բուցխրիկիձեի խոսքով, իր հայտարարության պատճառներից մեկը դարձել են Վրաստանի խորհրդարանի կողմից հանրային ծառայության մասին օրենքում կատարված փոփոխությունները: Նա նշում է, որ այս փոփոխությունները հանրային ծառայության վերացման և ոլորտում բարդ զարգացումների սկիզբ են:

«Սա հանրային ծառայության վերացման և շատ բարդ իրադարձությունների սկիզբ է, որը միայն ավելի կթուլացնի հանրային հատվածը և կկործանի այն։ Տալախաձեն, Պետրաշվիլին և խորհրդարանում նստած մյուս պատգամավորները իրավունք չունեն խորտակել մեր ապագան»,- հայտարարել է Բուցխրիկիձեն։

Բուցխրիկիձեն հավելել է, որ Ադիգենիի խորհրդում բոլորին հայտնի է իր դիրքորոշումը՝ երկրի ընթացիկ իրադարձությունների, ընդունված օրենքների, բռնությունների և եվրոպական ուղուց շեղման վերաբերյալ: Նա բազմիցս արտահայտել է իր կարծիքը և շարունակում է իր պաշտոնեական պարտականությունները կատարել խորհրդի աշխատակազմում՝ պաշտպանելով իր դիրքորոշումը:

Միխեիլ Բուցխրիկիձեն արդեն տասը տարի աշխատում է Ադիգենիի մունիցիպալիտետի խորհրդում՝ ապարատի ղեկավարի պաշտոնում։