უზენაესმა სასამართლომ გათავისუფლებულ აღმზრდელს და ბაღების გაერთიანებას მორიგება შესთავაზა

სამართალი

15.02.2023

ახალციხის პირველი ბაგადან გათავისუფლებული თანამშრომლის საქმეზე უზენაეს სასამართლოში პირველი სხდომა გაიმართა. მოსამართლემ მარინე ლილუაშვილსა და ა(ა)იპ სკოლამდელი აღზრდის დაწესებულებათა გაერთიანებას მორიგება შესთავაზა და ამ მიზეზით სხდომა ერთი თვით გადადო.

გათავისუფლებული თანამშრომლის ადვოკატის თქმით, მოსამართლის შეთავაზება მიიღეს. ბაღების გაერთიანებას შეთანხმების პირობები ჯერ არ წარუდგენია. ნინო დემეტრაძე ამბობს, რომ თუ დამსაქმებელი ლილუაშვილს სამსახურში აღადგენს, მხოლოდ განაცდურის ანაზღაურებას მოითხოვენ. თუ ბაღების გაერთიანება სამსახურში აღდგენაზე უარს იტყვის, განაცდურის ანაზღაურებასთან ერთად, კომპენსაციასაც მოითხოვენ, რომელიც სააპელაციო სასამართლომ დაადგინა.

„სააპელაციო სასამართლოში სამსახურში აღდგენის ნაწილი არ დაგვიკმაყოფილეს, თუმცა ბათილად ცნეს ყველა საყვედური და გათავისუფლების ბრძანება. აპელაციამ ორაზროვანი გადაწყვეტილება მიიღო, ყველაფერი ბათილად ცნო, თუმცა ლილუაშვილი სამსახურში არ აღადგინა", - აცხადებს დემეტრაძე „მეცხრე არხთან“.

სკოლამდელი აღზრდის დაწესებულებათა გაერთიანების დირექტორი, მარინე მერაბიშვილი ჩვენს სატელეფონო ზარებს არ პასუხობს.

მარინე ლალუაშვილი აღმზრდელად 35 წელი მუშაობდა. ამ ხნის განმავლობაში მას პირველი საყვედური 2021 წლის მარტში დაუწერეს, ივნისში კი კონფლიქტური სიტუაციების შექმნის მიზეზით გაათავისუფლეს.

გათავისუფლებულმა თანამშრომელმა ახალციხის რაიონულ სასამართლოს მიმართა. მოსამართლემ სკოლამდელი აღზრდის დაწესებულებათა გაერთიანების დირექტორის ორივე ბრძანება გააბათილა. მისი გადაწყვეტილებით, დირექტორს თანამშრომლის სამსახურში აღდგენა და განაცდურის ანაზღაურება დაევალა.