ახალციხის მუნიციპალიტეტს კიდევ ერთი მართლმადიდებლური ტაძარი შეემატა.  სოფელ ანში  ეკლესია, ახალციხისა და ტაო-კლარჯეთის მიტროპოლიტმა გახსნა. მეუფე თეოდორემ ტაძარში წირვა-ლოცვა აღავლინა, ადგილობრივები დალოცა და სოფელ ანის მოსახლეობას ქეთევან წამებულის ხსენების დღე მიულოცა.  

პრობლემურ საკითხთან დაკავშირებით,  სოფელ ჭელას მოსახლეობასთან შეხვედრა საჭიროა, – ასე გამოეხმაურა თეა წულუკიანი ჭელას მკვიდრთა განცხადებას, რომლებიც პრემიერსა და იუსტიციის მინისტრთან შეხვედრას ითხოვენ. ,,შეხვედრაში პრობლემას ვერ ვხედავ, ასე იყო სანამ მინისტრი გავხდებოდი და ასეა ახლაც”, – აღნიშნა თეა წულუკიანმა. ადიგენის მუნიციპალიტეტის სოფელ ჭელაში მინარეთის დემონტაჟი, 26 აგვისტოს,  ფინანსთა სამინისტროს შემოსავლების სამსახურმა მინარეთის კონსტრუქციის წონისა და სასაქონლო კოდის დეკლარირებულ მონაცემებთან შეუსაბამობის მიზეზით განახორციელა.      მომხდარი,  ადგილობრივი მოსახლეობის ნაწილმა გააპროტესტა.

მინარეთის კონსტრუქცია, რომელიც ამ ეტაპზე სოფელ ჭელის მაჰმადიანი მოსახლეობის საკუთრებაში რჩება, კანონიერად გაფორმდა. ამის შესახებ  „ექოსთან” განცხადება რეინტეგრაციის საკითხებში სახელმწიფო მინისტრმა გააკეთა. პაატა ზაქარეიშვილის თქმით, მოსახლეობას მისი ხელახალი დადგმის შესაძლებლობა ადგილობრივი თვითმმართველობის თანხმობის შემთხვევაში მიეცემათ.

მართლმადიდებელმა სამყარომ  დღეს იონე ნათლისმცემლის თავის კვეთის დღე აღნიშნა. დღესასწაული მრევლმა განსაკუთრებულად ასპინძის მუნიციპალიტეტში სოფელ მირაშხანთან მდებარე ტაძარში იზეიმა, სადაც  მრევლი ყოველი წლის 11 სექტემბერს საქართველოს სხვადასხვა ეპარქიიდან იკრიბება. მხოლოდ ამ დღეს  აქვე სასწაულიც აღესრულება.

მართლმადიდებელი ეკლესია ხვალ წმ. იოანე ნათლისმცემლის თავისკვეთის დღეს აღნიშნავს. ამათან დაკავშირებით ტაძრებში წირვა-ლოცვა ჩატარდება. წმინდა სახარების მიხედვით, წმიდა იოანე ნათლისმცემელს თავი გალილეის მმართველის, ჰეროდე ანტიპას ბრძანებით მოკვეთეს. მანამდე წმ. ნათლისმცემელი ჰეროდეს საპყრობილეში ჰყავდა დატყვევებული, რადგან მას უზნეო ცხოვრებისთვის დაუფარავად ამხელდა კანონიერი ცოლის დატოვებისა და საკუთარი ძმის, ფილიპეს მეუღლესთან, ჰეროდიადასთან უკანონო თანაცხოვრების გამო. წმ. წინასწარმეტყველის თავის მოკვეთის სურვილით ფილიპეს ჰეროდეას ქალიშვილმა, სალომეამ დედის ჩაგონებით მიმართა, რადგან მას სძულდა წმ. ნათლისმცემელი. სალომეა ფილიპეს დაბადების დღის აღსანიშნავ წვეულებაზე ცეკვავდა. მისი ცეკვით მოხიბლული ჰეროდე კი სალომეას ნებისმიერი სურვილის შესრულებას დაჰპირდა. სალომეამ ლანგარზე წმ. იოანე ნათლისმცემლის თავი მოითხოვა. წმ. იოანე ნათლისმცემლის თავისკვეთის დღეს მორწმუნეები ტრადიციულად მარხვით აღნიშნავენ.

იშხანში მიმდინარე სარესტავრაციო სამუშაოებით ქართული მხარე კმაყოფილია. თურქეთის ტერიტორიაზე არსებული ისტორიული ძეგლი საქართველოდან გამგზავრებულმა ჯგუფმა მოინახულა. ექსპერტებმა ბოლო პერიოდში განხორციელებული სამუშაოები ადგილზე შეაფასეს და მეზობელი ქვეყნის სპეციალისტებთან ერთად მიმდინარე და სამომავლოდ განსახორცილებელი ქმედებები განიხილეს.

მინარეთი უკვე  ადიგენის მუნიციპალიტეტშია. კონსტრუქცია სოფელ მლაშისა და ჭელას ნეიტრალურ ტერიტორიაზე განთავსდა და დაილუქა, რომელსაც დაცვის პოლიციის თანამშრომლები დაიცავენ. ადგილზე მათთვის  სპეციალური კაბინაც დაიდგა. სოფელ ჭელის მაჰმადიანი  მოსახლეობა აცხადებს, რომ სახელმწიფოს გადაწყვეტილება მინარეთის დალუქვასთან დაკავშირებით, მათთვის მიუღებელია.

   მინარეთი ამ დროისათვის უკვე ადიგენის მუნიციპალიტეტშია. არასამთავრობო ორგანიზაცია „სახალხო დარბაზის“ ერთ–ერთი დამფუძნებლის გოდერძი კუბლაშვილის ინფორმაციით, კონსტრუქცია სოფელ ჭელაში ნეიტრალურ ტერიტორიაზე დაილუქება, რომელსაც სახელმწიფო დაცვა დაენიშნება.    „დაველოდებით შემდგომ მოვლენებს. სახელმწიფოში არსებობს კანონი, რომელსაც უნდა დაემორჩილოს ყველა – ქრისტიანიც და მუსლიმიც. ჩვენ კანონმორჩილი ხალხი ვართ და აქედან გამომდინარე, არავის ხელი არ შევუშალეთ. სახელმწიფოს ინტერესები დავაყენეთ ჩვენ ინტერესებზე მაღლა. შევასრულეთ მეუფეების კურთხევა. მორწმუნე ადამიანები ვართ და ვემორჩილებით ჩვენს მამებსა და მეუფეებს. ამიტომ არანაირი წინააღმდეგობა  არ გაგვიწევია დღეს. სახელმწიფო თვითონ დაარეგულირებს სიტუაციას“ – განაცხადა გოდერძი კუბლაშვლმა. არასამთავრობო ორგანიზაციის წარმომადგენლის ინფორმაციით, სოფელ ჭელაში ამ დროისათვის სიმშვიდეა. გოდერძი კუბლაშვილი ირწმუნება, არანაირი დაპირისპირება მართლმადიდებელ და მუსლიმ მოსახლეობას შორის არ არის და არც იქნება.

    ახალციხეში გამართული აქციის მონაწილეთა მცირე ნაწილი სადგურის მიმდებარე ტერიტორიას ამ დრომდე არ ტოვებს. როგორც ადგილობრივი მკვიდრი, როინ თაქთაქიძე აცხადებს, ადიგენის მუნიციპალიტეტის მაცხოვრებლები ღამეს აქციის ადგილზე გაათენებენ. შეგახსენებთ, რომ მართლმადიდებელ მოსახლეობას დღეს ქორეპისკოპოსები – მეუფე თეოდორე და მეუფე იაკობი შეხვდნენ და მათ საპატრიარქოს გადაწყვეტილება გააცნეს. ლოცვა–კურთხევის საფუძველზე მოსახლეობა დაიშალა, თუმცა გარკვეული ჯგუფი ტერიტორიას მაინც არ ტოვებს. ისინი სამართლებრივ გარანტიას ითხოვენ, რომ სოფელ ჭელაში მინარეთი აღარ დამონტაჯდება.    “მეუფისგან მოვისმინეთ გარანტია, ახლა სამართალდამცველებისგან გვინდა იგივე გარანტია მივიღოთ, ამის შემდეგ შეიძლება დავიშალოთ” – აცხადებს ადიგენის ერთ–ერთი მკვიდრი. აქცია ახალციხეში დილიდან გაიმართა, სადაც ადიგენის მუნიციპალიტეტის სოფელ ჭელაში მინარეთის ხელახალი დამონტაჟების გადაწყვეტილება მართლმადიდებელმა მოსახლეობამ გააპროტესტა.

ამ წუთებში დასრულდა პარაკლისი  მაცხოვრის ზეცად ამაღლების სახელობის ტაძარში, რომელიც სპეციალურად ახალციხეში მიმდინარე მოვლენების გამო აღევლინა. ახალციხისა და ტაო–კლარჯეთის მიტროპოლიტმა მეუფე თეოდორემ ქადაგებისას განაცხადა, რომ საქართველოში არცერთი ადამიანის უფლება არ უნდა დაირღვეს:  ,,ჩვენ დავიცავთ ყველა იმ ადამიანის უფლებას, ვინც ჩვენს ქვეყანაში ცხოვრობს”– განაცხადა მეუფემ. შეგახსენებთ, რომ დაახლოებით ერთი საათის წინ ქორეპისკოპოსებმა თეოდორემ და იაკობმა ახალციხეში შეკრებილ აქციის მონაწილეებს დაშლისკენ მოუწოდეს. თუმცა ამ დრომდე ახალციხის ავტოსადგურის მიმდებარე ტერიტორიაზე ვითარება არ შეცვლილა. მინარეთის ჭელაში დაბრუნების უარყოფის მოთხოვნით აქცია გრძელდება.

მასალა, რომელიც ,,ექოს” გადამღებმა ჯგუფმა ერთი თვის წინ მოამზადა. შეგიძლიათ ნახოთ, რას ფიქრობდნენ მაშინ მართმადიდებლები მუსლიმი მეზობლების ქმედებაზე და რა განწყობა იყო ჭელაში.

ზარზმის მამათა მონასტრის წინამძღვარი ნიკოლოზი, აქციის მონაწილეებს ხვდება და დაშლისკენ მოუწოდებს. ,,მე ზარზმის მონასტრის წინამძღვარი ვარ და თუ დაიდგა მინარეთი, ფაქტიურად  ჩემს ეზოში უნდა დადგან, უნდა დაიშალოთ,  იმიტომ რომ სახელმწიფომ და ეკლესიამ ასე გადაწყვიტა, უნდა დაემორჩილოთ კანონებს. მე ვიქნები გარანტი რომ მინარეთი აღარ დაიდგმება”–აცხადებს ზარზმის წინამძღვარი.

,,ძალიან სამწუხაროა, რომ შემოსავლების სამსახურის გაუაზრებელმა და უგუნურმა ნაბიჯმა, პირდაპირი მაპროვოცირებელი როლი ითამაშა ქვეყანაში დაძაბულობის ახალი კერის შესაქმნელად, რელიგიური თავისუფლება გახლავთ ძალიან ფაქიზი და რთული საკითხი,  ხელისუფლებისა და სახელმწიფოს მთავარი ამოცანაა,  უზრუნველყოს ყველა ადამიანის კონსტიტუციური უფლების აღსრულება  ისე, რომ საფრთხე არ შეუქმნას ქვეყანაში მშვიდობას და სტაბილურობას.”– განაცხადა ერთიანი ნაციონალური მოძრაობიდან, პრეზიდენტობის კანდიდატმა დავით ბაქრაძემ.

ახალციხეში სიტყვით გამოსვლისას საპატრიარქოს ქორეპისკოპოსებმა იაკობმა და თეოდორემ  აქციის მონაწილეებს მოუწოდეს, რომ დაიშალონ და გალობით გადაინაცვლონ ამაღლების სახელობის ტაძარში და წირვა–ლოცვა აღავლინონ, თუმცა ამ განცხადებებს აქციის მონაწილეთა ნაწილის პროტესტი მოჰყვა. მეუფე თეოდორე  ამ წუთებში მრევლის ნაწილთან ერთად ტაძრისაკენ მიემართება, ადგილზე რჩება აქციის მონაწილეთა დიდი ნაწილი. ისინი ამბობენ, რომ არ დაუშვებენ მინარეთის ჭელაში დაბრუნებას.

ამ წუთებში ახალციხეში შეკრებილ აქციის მონაწილეებს ქორეპისკოპოსები თეოდორე და იაკობი მიმართავენ. ,,უნდა მივიღოთ ისეთი გადაწყვეტილება, რომელიც ჩვენი ერისთვის იქნება მომგებიანი, თქვენ აჩვენეთ, რომ ჩვენ შეგვიძლია სიყვარული, სამშობლოს დაცვა, ჩვენ შეგვიძლია ერთობლივად მშვიდად ვიცხოვროთ ერთმანეთთან. საქართველო ოდითგან არის ტოლერანტული ქვეყანა, მაგრამ ისე არ უნდა იყოს, რომ ჩვენ ვიყოთ ყველასათვის თავზე ხელის გადამსმელი და ჩვენ ვიყოთ დაჩაგრულები,  ეს ასე არ იქნება.  რაც შეეხება მინარეთის ამბებს,  სახელმწიფო კანონიერად მოიქცა, მართალია შეურაცხყოფილები დარჩნენ მუსულმანები, მაგრამ ჩვენ დღეს ვისაუბეთ იმის შესახებ, რომ შეიქმნას საბჭო, რათა შემდგომში აღარ მოხდეს ასეთი ქმედებები,  მე მინდა გითხრათ, რომ თქვენი გულანთებულობა მომწონს, მაგრამ არ ნიშნავს იმას რომ ჩვენ კანონი არ დავიცვათ. ქვეყანაში ყველას აქვს უფლება და ყველამ უნდა დაიცვას უმცირესობისა და უმრავლესობის უფლებები. ჩვენ უკანონობით  არ უნდა ვებრძოლოთ უკანონობას, ჩვენს ქვეყანაში უკანონობა აღარ უნდა იყოს”–   განაცხადა მეუფე თეოდორე ჭუაძემ.

გავრცელებულ ინფორმაციას, რომ  სოფელ ჭელის მუსლიმი მოსახლეობა ახალციხეში მართლმადიდებლების აქციისკენ მიემართება – სამცხე–ჯავახეთის მუფთი უარყოფს. მამუკა ვაშაყმაძის თქმით, საპატრიარქოსა და სრულიად საქართველოს მუსლიმთა სამმართველოს შორის შეთანხმება მიღწეულია. მუსლიმთა სულიერი ლიდერი ახალციხეში მიმდინარე პროცესებსაც ეხმაურება და ამბობს, რომ განვითარებული მოვლენები სამწუხაროა და მის მოგვარებაში არა მარტო საპატრიარქო, არამედ სახელმწიფო უნდა იყოს ჩართული.  ,,არც ერთი მუსლიმი ადამიანი ახალციხეში არ მიდის, ისინი მინარეთს  სოფელ ჭელაში ელოდებიან. არ ვაპირებთ მართლმადიდებლებთან შეწინააღმდეგებას. ვთვლით, რომ სახელმწიფომ არ უნდა დაუშვას ჩვენს მართლმადიდებელ ძმებთან დაპირისპირება”–განაცხადა ,,ექოსთან” სატელეფონო საუბარში მამუკა ვაშაყმაძემ.

ახლახანს, აქციაზე  გავრცელდა არაოფიციალური ინფორმაცია, რომ ახალციხეში ჭელის მუსლიმი მოსახლეობა მოემართება. სავარაუდოდ ისინი მართმადიდებლების მოთხოვნებს გააპროტესტებენ. ვრცელდება ინფორმაცია იმის შესახებაც, რომ ადიგენში მათ შესაჩერებლად პოლიცია გაემართა, რათა თავიდან აცილებული იქნეს შესაძლო დაპირისპირება.  როგორ განვითარდება მოვლენები და დადასტურდება თუ არა ინფორმაცია, ამის შესახებ ,,ექო” დეტალებს  პერიოდულად მოგაწვდით.

ამ წუთებში, ახალციხეში გამართულ აქციაზე, ერთერთმა ორგანიზატორმა გიორგი კოპაძემ, შეკრებილ მოსახლეობას აცნობა, რომ სასულიერო პირებთან ერთად ახალციხეში ცენტრალური ხელისუფლების წარმომადგენლებიც ჩამოვლენ. ,,არ ვიცით რა განცხადებებს გააკეთებენ ისინი,  თუმცა ჩვენ არ უნდა დავიშალოთ, ყველამ ერთად მოვუსმინოთ რას გვეტყვიან. თუ ვართ ათასნი, უნდა გავხდეთ 3 ათასნი, მოიმარჯვეთ მობილური ტელეფონები და დაურეკეთ თქვენს ახლობლებს, უნდა ვაჩვენოთ მათ, ვინ ვართ ჩვენ”– განაცხადა გიორგი კოპაძემ.

     სოფელ ჭელაში არსებულ მეჩეთზე მოხსნილი მინარეთი დასაწყობდება და დაილუქება – ამის შესახებ საპატრიარქოსა და სრულიად საქართველოს მუსლიმთა სამმართველოს ერთობლივ განცხადებაშია ნათქვამი. ერთობლივი განცხადება ჟურნალისტებს დღეს საპატრიარქოს პრესსამსახურის ხელმძღვანელმა მამა დავით შარაშენიძემ გააცნო. მისი ინფორმაციით, კათოლიკოს-პატრიარქი და მღვდელმთავრები საპატრიარქოში დღეს საქართველოს მუსლიმ რელიგიურ ლიდერებს შეხვდნენ და ადიგენში განვითარებულ მოვლენებზე ესაუბრნენ. ერთობლივი განცხადების თანახმად, საპატრიარქო აბსოლუტურად ეთანხმება მართლმადიდებელი მრევლის სამართლიან პროტესტს მომხდართან დაკავშირებით. ამასთან, ითვალისწინებს მუსლიმი მოსახლეობის განწყობასაც და სამმართველოსთან შეთანხმებით აცხადებს: “მინარეთი დასაწყობდეს სოფელ ჭელაში, ნეიტრალურ ადგილზე, დაილუქოს და იყოს დაცული სახელმწიფოს მიერ; არ მოხდეს მისი სადმე აღმართვა, ვიდრე არ მოწესრიგდება საკანონმდებლო ბაზა და არ შედგება მოლაპარაკება საპატრიარქოსა და მუსლიმთა საბჭოს შორის; ეთხოვოს ხელისუფლებას, დაიწყოს მუშაობა, რათა კანონით განისაზღვროს რელიგიური ნაგებობების მშენებლობების მიზანშეწონილობისა და ნებართვის გაცემის საკითხი, რათა თავიდან იქნას აცილებული რელიგიურ ნიაგდაზე შფოთი და დაპირისპირება; ამასთან, მივმართავთ მრევლს, თავი შეიკავონ გამოსვლებისგან, შეინარჩუნონ სიმშვიდე და ურთიერთპატივისცემა”, – ნათქვამია ერთობლივ განცხადებაში. პრესკონფერენციაზე კომენტარები გააკეთეს პატრიარქის ქორეპისკოპოსმა, ახალციხისა და ტაო-კლარჯეთის მიტროპოლიტმა თეოდორე ჭუაძემ და სრულიად საქართველოს მუფთმა ჯემალ პაქსაძემ. მეუფე თეოდორეს განცხადებით, პატრიარქთან შეთანხმებით შეიქმნება მართლმადიდებელი და მუსლიმი მაღალი სასულიერო პირებისგან დაკომპლექტებული საბჭო, რათა რელიგიურ ნიადაგზე მომხდარი მსგავსი ფაქტები არ განმეორდეს და მეტი ურთიერთკომუნიკაცია იყოს. მუფტმა ჯემალ პაქსაძემ კი აღნიშნა, რომ პატრიარქის ამ გადაწყვეტილებას ეთანხმება. მისი თქმით, მინარეთი მფლობელს დაუბრუნდება და დასაწყობდება, მისი მშენებლობის საკითხი კი მართლმადიდებელ სასულიერო პირებთან, იურისტებთან და სახელმწიფოსთან შეთანხმებით გადაწყდება. როგორც პაქსაძემ აღნიშნა, მინარეთის მშენებლობაზე ოფიციალური ნებართვა არ არსებობდა, რადგან ამას ამ ეტაპზე კანონი არ არეგულირებს. ამასთან პატრიარქის ქორეპისკოპოსები იაკობი და თეოდორე ახალციხეში გაემგზავრებიან, სადაც მრევლს შეხვდებიან. წყარო: “ინტერპრესნიუსი”

არასამთავრობო ორგანიზაცია „საზოგადოებრივი დარბაზის“  ხელმძღვანელმა გოდერძი  კუბლაშვილმა ახალციხის ავტოსადგურის მიმდებარე ტერიტორიაზე შეკრებილ მოსახლეობას კიდევ ერთხელ მიმართა: „ჩვენ არ ვიშლებით არავითარ შემთხვევაში! მინარეთს ცოცხალი თავით არ გავატარებთ!“ განუცხადა აქციის მონაწილეებს კუბლაშვილმა. შეგახსენებთ, რომ მართლმადიდებელ მოსახლეობას სადგურის მიმდებარე ტერიტორია გადაკეტილი აქვს. მართლმადიდებლები მინარეთის სოფელ ჭელაში დაბრუნების გადაწყვეტილებას აპროტესტებენ. რომლის დემონტაჟიც 26 აგვისტოს განხორციელდა