ახალციხეში დასუფთავების აქცია მიმდინარეობს.  სხვადასხვა დაწესებულების წარმომადგენლებმა ხელოვნური ტბის მიმდებარე ტერიტორია დილიდან დაასუფთავეს. აქცია მართავენ სამცხე–ჯავახეთის სახელმწიფო სასწავლო უნივერსიტეტისა და საჯარო სკოლების ახალგაზრდებიც, რომლებიც თავიანთი სასწავლებლის მიმდებარე ტერიტორიას ასუფთავებენ. დასუფთავების აქცია სახელწოდებით ,,დავასუფთაოთ მსოფლიო – დავასუფთაოთ საქართველო“ პროექტის ,,დავასუფთაოთ საქართველო –  საზოგადოების ცნობიერების ამაღლება და მისი ჩართვა მყარი საყოფაცხოვრებო ნარჩენების მართვის გაუმჯობესების პროცესში“  ფარგლებში ჩატარდა.  პროექტს  შვედეთის საერთაშორისო განვითარების სააგენტოს (Sida) მხარდაჭერით, ახორციელებს არასამთავრობო ორგანიზაციათა კონსორციუმი – ,,საქართველოს მწვანეთა მოძრაობა დედამიწის მეგობრები/საქართველო“, მდგრადი განვითარების კავშირი ,,ეკოხედვა“  და საქართველოს ბუნების მკვლევართა კავშირი ,,ორქისი’’ „დავასუფთაოთ საქართველო“  საერთაშორისო კამპანიის „დავასუფთაოთ მსოფლიო“ -ს (Clean Up the World) ფარგლებში ხორციელდება. აქცია ხვალ აბასთუმანში გაგრძელდება, სადაც მონაწილეები პარკის მიმდებარე ტერიტორიას დაასუფთავებენ. დასუფთავების ფართომასშტაბიანი აქცია საქართველოში უკვე მეოთხედ ტარდება. აღნიშნული ღონისძიება ქვეყნის მასშტაბით 22 სექტემბერს დასრულდება.

    მიხეილ სააკაშვილი ამ წუთებში ახალციხეში სასტუმრო “ლომსიაში” იმყოფება. ქვეყნის პირველმა პირმა “ერთიანი ნაციონალური მოძრაობის” გენერალური მდივნის სახლი, რამდენიმე წუთის წინ  დატოვა. “მეცხრე არხის” კორესპონდენტის თაკო ფეიქრიშვილს ინფორმაციით, მიხეილ სააკაშვილს კომენტარი მედიასთან არ გაუკეთებია. კომენტარს არც ვანო მერაბიშვილის ოჯახის წევრები  აკეთებენ. შეგახსენებთ, რომ ახალციხეში ვანო მერაბიშვილის სახლის მიმდებარე ტერიოტორიას, დილიდან სამართალდამცავები აკონტროლებდნენ. ქვეყნის პირველი პირი  ახალციხეში, ვანო მერაბიშვილის ოჯახში სტუმრობამდე, ახალქალაქში იმყოფებოდა, სადაც საგანმანათლებლო დაწესებულებებს ეწვია  და მოსწავლეებს ახალი სასწავლო წლის დაწყება მიულოცა. დღეს, მიხეილ სააკაშვილი სამცხე–ჯავახეთს არაოფიციალური ვიზიტით სტუმრობს.

მიხეილ სააკაშვილი უკვე ახალციხეშია. ამ წუთებში იგი ვანო მერაბიშვილის ოჯახში იმყოფება.  ადგილზეა  “მეცხრე არხის” კორესპონდენტიც.  მისი ინფორმაციით, მედიასაშუალებებს პრეზიდენტის ვიზიტის გაშუქების უფლებას არ აძლევენ. შეგახსენებთ, რომ ახალციხეში ვანო მერაბიშვილის სახლის მიმდებარე ტერიტორიას დილიდან სამართალდამცავები აკონტროლებდნენ.

პარტნიორული ვიზიტის მეორე ეტაპის ფარგლებში ტელეკომპანია ,,მე–9 არხის“ ოთხი  თანამშრომელი ამერიკის შეერთებულ შტატებში გაემგზავრა. “საერთაშორისო კვლევებისა და გაცვლების საბჭოს” (IREX) მიერ განხორციელებული პროექტის ფარგლებში, ისინი ქალაქ ერაში არსებულ  ტელეკომპანია „WICU“ -ს ესტუმრებიან.

  მინარეთის კონსტრუქცია უკვე  ადიგენის მუნიციპალიტეტშია, რომელიც ტრაილერიდან რამდენიმე წუთის წინ  ჩამოცალეს. იგი სოფელ მლაშისა და ჭელას ნეიტრალურ ტერიტორიაზე განთავსდა და დაილუქა, რომელსაც დაცვის პოლიციის თანამშრომლები დაიცავენ. ადგილზე მათთვის  სპეციალური კაბინაც დაიდგა. იმ ტერიტორიაზე, სადაც მინარეთის კონსტრუქცია განთავსდა, ამ წუთებში სამართალდამცავები არიან მობილიზებულნნი, აქვე იმყოფება ადგილობრივი მოსახლეობაც.  

ძლიერმა სეტყვამ და გრიგალმა ახალქალაქის მუნიციპალიტეტის სოფელი პტენა დააზარალა. გვიან ღამით დაფიქსირებულმა სტიქიამ ადგილობრივებს ხეხილი, ნათესები და ნარგავები მთლიანად გაუნადგურა. დაზიანებულია საცხოვრებელი სახლები და ავტომობილებიც.

საქართველოს საპატრიარქო შესაბამის სამთავრობო სტრუქტურებს მიმართავს, დროულად მოხდეს ქართველი სპეციალისტების ჩართვა იშხნის რესტავრაციის პროცესში , – ამის შესახებ სრულიად საქართველოს კათოლიკოს-პატრიარქის ქორეპისკოპოსის, ახალციხისა და ტაო-კლარჯეთის მიტროპოლიტის, თეოდორე (ჭუაძის) მიერ გავრცელებულ განცხადებაშია ნათქვამი. საპატრიარქოს ინფორმაციით, იშხნის ტაძრის სარესტავრაციო სამუშაოები ქართველი სპეციალისტების გარეშე მიმდინარეობს. “ა.წ. 6-7 ივლისს, ტაო-კლარჯეთში ყოფნისას და ქართული ეკლესია-მონასტრების მოლოცვისას მოვინახულეთ იშხნის ტაძარიც. სამწუხაროდ, აქ კვლავ სწრაფი ტემპით გრძელდება სარესტავრაციო სამუშაოები და ეს პროცესი ქართველი სპეციალისტების გარეშე მიმდინარეობს. სამშენებლო სამუშაოების მომიზეზებით, ჩვენ არ მოგვცეს ეკლესიაში შესვლის უფლებაც კი და მხოლოდ გარედან მოვახერხეთ დათვალიერება. როგორც ამ ეპარქიის მღვდელმთავარმა, მინდა ვთხოვო შესაბამის სამთავრობო სტრუქტურებს, რომ დროულად მოხდეს ქართველი სპეციალისტების ჩართვა იშხნის რესტავრაციაში, რათა ჩვენი წვლილი შევიტანოთ ჩვენი წინაპრების მემკვიდრეობის დაცვაში და ამასთან, შესაძლო უხეში შეცდომებისაგან დავიცვათ ეს ძეგლი”, – ნათქვამია სრულიად საქართველოს კათოლიკოს-პატრიარქის ქორეპისკოპოსის, ახალციხისა და ტაო-კლარჯეთის მიტროპოლიტის თეოდორე (ჭუაძის) განცხადებაში. წყარო “ინტერპრესნიუსი”

ახალციხის მუნიციპალიტეტის სოფელ ანდრიაწმინდაში დღეს დაახლოებით დღის სამ საათზე მოსულმა სეტყვამ სასოფლო–სამეურნეო სავარგულები მთლიანად გაანადგურა. განადგურებულია ნათესები, ნარგავები, ხეხილი, ბოსტნეული. დამტვრეულია სახურავები, დაზიანებულია სოფელთან მისასვლელი გზა. ინფორმაცია და ფოტო მასალა სტიქიის შესახებ ,,ექოს” ადგილობრივმა მკვიდრმა მიხეილ ინასარიძემ მიაწოდა.

კოალიცია “ქართული ოცნების” წევრები დღეს 15:00 საათზე ახალციხის ადმინისტრაციული შენობის წინ შეიკრიბნენ და საპროტესტო აქცია გამართეს. აქციის მონაწილეემა საკრებულოს თავმჯდომარის ოლეგ სანდროშვილის გადადგომა მოითხოვეს. მათი განცხადებით, სანდროშვილი “ერთიანი ნაციონალური მოძრაობის” პოლიტიკის გამტარებელია. რას პასუხობს საკრებულოს თავმჯდომარე აქციის მონაწილეებს ნახეთ დღეს, “ექოს” მთავარ გამოშვებაში.

„ერთიანი ნაციონალური მოძრაობის“ გენერალური მდივანი დაკავებულია. საგამოძიებო სამსახურის დასავლეთ საქართველოს ბიუროში ვანო მერაბიშვილის დაკითხვა, რომელიც ოთხ საათს გრძელდებოდა, მისი დაკავებით დასრულდა. პროკურატურის ცნობით, მერაბიშვილმა 5 მილიონი ლარი რამდენიმე ათეულ პირს უკანონოდ ჩაურიცხა. გარდა ამისა, ვანო მერაბიშვილს, სამსახუროებრივი უფლებამოსილების ბოროტად გამოყენებით, კვარიათში აგარაკის მითვისება ედება ბრალად. რას ფიქრობენ ვანო მერაბიშვილის დაკავებასთან დაკავშირებით მის მშობლიურ კუთხეში და როგორი შეფასებები მოჰყვა აღნიშნულ ფაქტს ახალციხეში არსებული პოლიტიკური პარტიების მხრიდან, ნახეთ ,,ექოს“ მთავარ გამოშვებაში.

სოფელ ჭაჭარაქში მდებარე ნაგავსაყრელი, სადაც შ.პ.ს. „კეთილმოწყობას“ მუნიციპალიტეტის ნაგავი გააქვს, ახლო მომავალში გაუქმდება. ადგილობრივი ხელისუფლება მოსახლეობას ნაგავსაყრელის ნაცვლად, გადამამუშავებელი საწარმოს მშენებლობას სთავაზობს. „ეს შორეული პერსპექტივა არ არის. რადგან მოვიდა მოთხოვნა, რომ სახელმწიფოს გადავცეთ აღნიშნული ნაგავსაყრელი, ეს იმას ნიშნავს, რომ საწარმოს მშენებლობა ახლო მომავალში დაიწყება“ – აცხადებს ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე. მუნიციპალიტეტის ნაგავსაყრელი სოფელ ჭაჭარაქში წლებია არსებობს. მის გარშემო მოსახლეობის სასოფლო–სამეურნეო სავარგულებია განთავსებული. ტერიტორიული გაერთიანების რწმუნებულის თქმით, ადგილობრივები აღნიშნული ნაგავსაყრელის შემოღობვას ითხოვენ, რადგან ნაგავი მათ ნათესებში იფანტება. იმის გამო, რომ ნაგვის გადამამუშავებელი საწარმოს მშენებლობა იგეგმება, ბესიკ ბლიაძე ნაგავსაყრელის შემოღობვის საჭიროებას ვერ ხედავს.

ახალციხის ციხე ხვალ ფესტივალ „რაბათის გაზაფხულს“ უმასპინძლებს. საქართველოს სხვადასხვა რეგიონის ქორეოგრაფიული ანსამბლები მესხი მაყურებლის წინაშე წარსდგებიან. ღონისძიება ციხის ქვედა ნაწილში – ამფითეატრში 13 საათზე დაიწყება. მასზე დასწრება ნებისმიერი მსურველისთვისაა შესაძლებელი. ,,რაბათის გაზაფხულში” მონაწილეობას 20– ზე მეტი ფოლკლორული ანსამბლი მიიღებს. ფესტივალი მესხეთში საქართველოს ქორეოგრაფიის შემოქმედებითი კავშირისა და სამცხე–ჯავახეთის რეგიონული ორგანიზაციის ინიციატივით გაიმართება. შეგახსენებთ, რომ ახალციხის ციხეში ტურისტული სეზონი 11 მაისს გაიხსნა, მას შემდეგ კომპლექსმა ორ ღონისძიებას, ფესტივალ ,,ქართულ სულსა” და ,,თამარობას” უმასპინძლა.

ასპინძის მუნიციპალიტეტის საკრებულოს სხდომაზე დღეს ახალი გამგებელი აირჩიეს. საკანონმდებლო ორგანოს 22–ვე დეპუტატის გადაწყვეტილებით, გამგეობის პირველი პირი ადგილობრივი მკვიდრი ლევან ცაბაძე გახდა. ყოფილმა გამგებელმა ბესიკ ბექაურმა თანამდებობა 23 აპრილს პირადი განცხადების საფუძველზე დატოვა. 10 დღის განმავლობაში საკრებულოში გამგეობის პირველი პირის პოსტზე 8 განაცხადი შევიდა. საკონკურსო კომისიის გადაწყვეტილებით არასრული დოკუმენტაციის წარდგენის გამო 5–მა მათგანმა კონკურსის პირველი ეტაპი ვერ გადალახა. 13 მაისს კომისია დარჩენილ სამ კანდიდატს გაესაუბრა და მუნიციპალიტეტის განვითარებასთან დაკავშირებით მათი გეგმები მოისმინა. საკრებულოს თავმჯდომარის ალექსანდრე მელიქიძის განმარტებით, კომისიისთვის ყველაზე მისაღები ლევან ცაბაძის მიერ წარმოდგენილი გეგმა იყო. გამგებლობის ერთ–ერთი ყოფილი კანდიდატი პაატა მაისურაძე საკრებულოს გადაწყვეტილებას აპროტესტებს და აცხადებს, რომ ლევან ცაბაძემ საკრებულოში ყალბი დიპლომი წარადგინა. „13 მაისს საკონკურსო კომისიის მიერ ლევან ცაბაძის შერჩევა გავასაჩივრე, თუმცა ჩემი საჩივარი კომისიამ არ განიხილა. საკრებულოს დეპუტატები დააშინეს და მას მხარი ყველა მათგანმა ამიტომ დაუჭირა“ – აცხადებს პაატა მაისურაძე. ყოფილი კანდიდატი ახალი გამგებლის დანიშვნის გასაჩივრებას სასამართლოში აპირებს. თავის მხრივ, ლევან ცაბაძე ამ ბრალდებებს აბსურდულს უწოდებს. მისი განმარტებით, სამომავლოდ სტრუქტურულ ცვლილებებს გეგმავს. ასპინძის მუნიციპალიტეტის ახალი გამგებელს პირველ რიგში, სოფლის მეურნეობის პრობლემების მოგვარება აქვს გადაწყვეტილი.

ტყისა და ველური ბუნების მართვის დეპარტამენტის, სამცხე–ჯავახეთის სამმართველოს უფროსად ზვიად ლომსაძე მიმდინარე წლის 13 მაისს დაინიშნა. ამის შესახებ ,,ექოს“ ინფორმაცია ბუნებრივი რესურსების სააგენტოს პრესსამსახურმა მიაწოდა. შეგახსენებთ, რომ სამსახურში რეორგანიზაცია მიმდინარეობდა. მანამდე კი 1 მაისს გავრცელელდა ინფორმაცია, რომ სააგენტოს რეგიონული სამმართველოს უფროსად ამავე სამსახურის უფროსი მეტყევე დავით კახიშვილი დაინიშნა, თუმცა მეორე დღესვე ის სამსახურიდან გაათავისუფლეს. აღნიშნული პოსტი 2013 წლის იანვრიდან მიმდინარე წლის 30 აპრილამდე, ვიქტორ კვირცხალიას ეკავა.

მიხეილ სააკაშვილმა 16 მაისი გლოვის დღედ გამოაცხადა. შესაბამისი განკარგულება პრეზიდენტის ადმინისტრაციის ოფიციალურ გვერდზე გამოქვეყნდა. საქართველოს პრეზიდენტის განკარგულება 2013 წლის 16 მაისის გლოვის დღედ გამოცხადების შესახებ N 15/05/01 2013 წლის 15 მაისი ქ.თბილისი 1. ავღანეთში უსაფრთხოების ხელშეწყობის საერთაშორისო ძალების შემადგენლობაში (ISAF) სამშვიდობო მისიაში მონაწილეობისას 2013 წლის 13 მაისს ტერორისტული თავდასხმის შედეგად დაღუპული საქართველოს შეიარაღებული ძალების 3 სამხედრო მოსამსახურის ხსოვნის უკვდავსაყოფად საქართველოში 2013 წლის 16 მაისი გამოცხადდეს გლოვის დღედ. 2. აღნიშნულთან დაკავშირებით, 2013 წლის 16 მაისს საქართველოს მთელ ტერიტორიაზე დაშვებულ იქნას სახელმწიფო დროშები . მიხეილ სააკაშვილი. 16 მაისის გლოვის დღედ გამოცხადების ინიციატივით საქართველოს მთავრობა გამოვიდა და პრეზიდენტს მიმართა. ავღანეთის საერთაშორისო მისიაში მონაწილე ქართველი სამხედროების ბაზაზე 13 მაისს, მასშტაბური ტერორისტული თავდასხმა განხორციელდა. რომლის შედეგადაც სამი ქართველი სამხედრო მოსამსახურე– კაპრალი ალექსანდრე კვიწინაძე, კაპრალი ვლადიმერ შანავა და უმცროსი სერჟანტი ზვიად დავითაძე დაიღუპა.

ადგილობრივ თვითმმართველობაში საკადრო ცვლილება განხორციელდა. ახალციხის მუნიციპალიტეტის გამგებლის მოვალეობის შემსრულებლის მოადგილედ მალხაზ ჟუჟუნაძე დაინიშნა. აღნიშნული თანამდებობა მანამდე 2012 წლის 12 დეკემბრიდან ავთანდილ თელიაშვილს ეკავა, რომელმაც იურიდიულ საკითხებში მთავარი სპეციალისტი თორნიკე ხმალაძე შეცვალა. აღნიშნული ინფორმაცია ,,ექოს“ ახალციხის მუნიციპალიტეტის გამგეობის ადმინისტრაციული სამსახურის უფროსმა მაკა სამსონიძემ დაუდასტურა. მალხაზ ჟუჟუნაძე წლების განმავლობაში სხვადასხვა სტრუქტურაში მუშაობდა. მას ჯერ ძალოვან უწყებებში ეკავა წამყვანი თანამდებობები, შემდეგ კი ახალციხის # 37–ე საოლქო საარჩევნო კომისიის თავმჯდომარე იყო. 2007 წელს იგი ნარკოტიკების შეძენა –შენახვის ფაქტზე უკანონოდ დააკავეს. 8 თვიანი პატიმრობის შემდეგ კი ბრალი თავისუფლების სანაცვლოდ აღიარა და საპატიმროდან საპროცესო შეთანხმებით გამოვიდა. დღეისათვის მალხაზ ჟუჟუნაძე პოლიტიკური პატიმრის სტატუსის მოსაპოვებლად იბრძვის. მას პროკურატურაში საჩივარი აქვს შეტანილი, რის საფუძველზეც უკანონო პატიმრობასთან დაკავშირებით გამოძიება მიმდინარეობს.

ფესტივალს ,,ქართული სული 2013“ ამჯერად ახალციხე უმასპინძლებს. რომლის ფარგლებში დაგეგმილი ღონისძიებები 11 მაისს 11 საათზე დაიწყება. სამცხე–ჯავახეთის სახელმწიფო–სასწავლო უნივერსიტეტის მეორე კორპუსში სამეცნიერო კონფერენცია–,,თამარ მეფე 800“ ჩატარდება. მასში მონაწილეობას მოწვეული და ადგილობრივი პროფესორები მიიღებენ. ორგანიზატორები 17 საათზე მსურველებს ახალციხის ციხეში ეპატიჟებიან. ისტორიულ კომპლექსში ტურისტული სეზონი ოფიციალურად გაიხსნება. ამფითეატრში უკვე დამონტაჟებულია სცენა, სადაც უფასო კონცერტი უნდა გაიმართოს. ხელოვნების ფესტივალის–,,ქართული სული 2013“–ის ორგანიზატორი კახური ტრადიციული მეღვინეობაა. კონცერტში მონაწილეობას ცნობილი ქორეოგრაფიული და ფოლკლორული ანსამბლები ,,ქართულ ხმები“, ტრიო ,,სიმი“, ,,მესხეთი“ და კიდევ ბევრი მაყურებლისათვის საყვარელი მომღერალი, მსახიობი და პოეტი მიიღებს. ფესტივალში ადგილობრივი ანსამბლებიც ჩაერთვებიან. ახალციხეს ეწვევიან ცენტრალური ხელისუფლების წარმომადგენლებიც, იგეგმება პრემიერ მინისტრის ვიზიტიც. 11 მაისის ღონისძიებები გრანდიოზული ფეირვერკით დასრულდება.

1 მაისს გავრცელდა ინფორმაცია იმის შესახებ, რომ ტყისა და ველური ბუნების მართვის დეპარტამენტის, სამცხე–ჯავახეთის სამმართველოს უფროსად დავით კახიშვილი დაინიშნა. აღნიშნული ინფორმაცია ,,ექოს” გუშინ კახიშვილმაც დაუდასტურა. თუმცა როგორც დღეს გაირკვა, სამცხე–ჯავახეთის სატყეო–სამმართველოს უფროსის თანამდებობა კვლავ ვაკანტურია. აღნიშნული პოსტი 2013 წლის იანვრიდან მიმდინარე წლის 30 აპრილამდე, ვიქტორ კვირცხალიას ეკავა. როგორც მან ,,ექოს” სატელეფონო საუბრისას განუმარტა, თანამდებობაზე მუშაობის გასაგრძელებლად განცხადება დაწერილი აქვს– ,,ჩვენ ყოველთვიურად გვიფორმდება ხელშეკრულებები, რომელიც წყვეტს ჩვენი საქმიანობის გაგრძელების საკითხს. 30 აპრილს გაუვიდა ვადა ჩემს ხელშეკრულებას და ველოდები განაცხადს დამნიშნავენ თუ არა ისევ თანამდებობაზე, სადაც ამ დრომდე ვმუშაობდი”–აცხადებს ვიქტორ კვირცხალია. რაც შეეხება დავით კახიშვილს, რომელიც ამავე სამმართველოში უფროს მეტყევედ 2012 წლის ივნისის თვიდან, მიმდინარე წლის 30 აპრილამდე მუშაობდა და 1 მაისს უფროსის თანამდებობაზე მოიაზრებოდა, დღეის მდგომარეობით სამსახურიდან გათავისუფლებულია. ,,მქონდა ინფორმაცია, რომ დავინიშნე უფროსის თანამდებობაზე, დღეს უფროს მეტყევედაც აღარ ვმუშაობ, შრომითი ხელშეკრულება აღარ გამიგრძელეს” –აცხადებს კახიშვილი. სატყეო–სამმართველოში ვითარების გარკვევას სადღესასწაულო დღეების გასვლის შემდეგ ელოდებიან.

ბორჯომის მუნიციპალიტეტში ხანძარი 30 აპრილს, საღამოს გაჩნდა. ტყის მასივს ცეცხლი ორი სოფლის, დაბაძველისა და ჭობისხევის მიმდებარე ტერიტორიაზე გაუჩნდა. ამ დროისათვის ხანძარი ლოკალიზებულია და გავრცელების საფრთხე აღარ არსებობს, განმარტავს ,,ექოსთან“ საუბარში, ტყისა და ველური ბუნების მართვის დეპარტამენტის, სამცხე–ჯავახეთის სამმართველოს უფროსი დავით კახიშვილი, რომელიც აღნიშნულ თანამდებობაზე დღეს დაინიშნა. ,,ხანძარი ამ დროისათვის ლოკალიზებულია. მიმდინარეობს სალიკვიდაციო სამუშაოები, ადგილზე მობილიზებულია სახანძრო–სამაშველო სამსახურისა და სატყეო–სამმართველოს ჯგუფები, თუ რა ფართობი დაიწვა ჯერჯერობით არ ვიცით, ზარალი ლიკვიდაციის შემდეგ დაითვლება, ჯერჯერობით არ ვიცით რამ გამოიწვია ხანძარი“ –აცხადებს დავით კახიშვილი.